काठमाडौं, सम्बन्धविच्छेदको गसिपले केही सातायता बलिउड तातिरहेको बेला अभिनेत्री मनिषा कोइराला मलायम सिनेमा (मलिउड)को ताजा पानी चाख्ने तयारीमा छिन् । चर्चित निर्देशक लेनिन् राजेन्द्रनले निर्देशन गर्ने सिक्वेल सिनेमा ‘एडाभापती’बाट नेपाली हिरोइनले डेब्यु गर्न लागेकी हुन् । उनी एकमहिनायता योग र ध्यानका लागि भारतमै छिन् ।

यो प्रोजेक्टमा मनिषाको भूमिका लिड हुनेछ । सिनेमाले भारत र तिब्बतबीचको सम्बन्धलाई उत्खनन् गर्ने प्रयास गर्नेछ । सकेसम्म कुनै खास वर्ग र विषयमा सिनेमा नबनाउने राजेन्द्रनका सिनेमा मलायम चलचित्रमा विशेष फरक हुने गर्छन् । संगीत सिवानको ‘योद्धा’मा रिम्पोछेको भूमिका गरेका सिद्धार्थ ‘एडाभापती’मा पनि लिड भूमिकाबाटै मलायम सिनेमामा कमब्याक गर्दैछन् । उनी एकपटक पुनः लामाको भूमिकामा क्यामेराअगाडि देखिनेछन् । जगाती श्रीकुमार पनि मुख्य भूमिकामा हुनेछन् ।

यो सिनेमा अँग्रेजी भाषामा पनि निर्माण हुनेछ र यसको अँग्रेजी टाइटल ‘नो म्यान आइल्यान्ड’ हुनेछ । गत महिना मेरोसिनेमासँग कुरा गर्दै मनिषाले आफूलाई बलिउडका चारवटा सिनेमाबाट अफर आएको बताएकी थिइन् । यसैबीच, भारतीय मिडियाले मनिषाले औपचारिकरुपमै डिभोर्स गर्न लागेको कुरा लेखेका छन् । भारतीय अनलाइन एनडीटीभी लेख्छ –‘मनिषा पति सम्राटसँग डिभोर्स गरेर मुम्बइमा पुनः सेटल हुन चाहन्छिन् ।’

यद्यपी उक्त खबरमा स्रोत उल्लेख नगरिकन ‘बज्’ (गसिप) भनेर लेखिएको छ । कतिपयले यसलाई पब्लिसिटी स्टन्टका रुपमा लिएका छन् । तर, मनिषा निकट स्रोतहरूले भने भारतीय समाचारहरूलाई ‘टीआरपी’ भनेका छन् । मेरोसिनेमा