काठमाडौं, माघ २,

यो वर्षको माघे संक्रान्तिमा तरुलको मात्रै २ करोड रुपैंया भन्दा बढीको कारोबार भएको छ । पुस १५ देखि हिजो माघे संक्रान्तिसम्म १२ सय देखि १४ सय ७५ मेट्रिक टन तरुलको कारोबार भएको छ । तरुलको भाउ १८ रुपैंयालाई औसत मान्दा पनि किसान तथा व्यापारीले साढे दुई करोड रुपैंया भन्दा बढीको कारोबार गरेका छन् ।

थोक बजारमा झण्डै एक महिना १६ देखि १८ रुपैंया रहेको तरुलको भाउ अस्ति र हिजो ह्वात्तै बढेर २८ रुपैंयासम्म पुगेको थियो । खुद्रा व्यापारीले भने ३५ देखि ४५ रुपैंया किलोसम्ममा बिक्री गरेका थिए । गएको वर्षको तुलनामा यो वर्ष भाउ पनि १० देखि १२ प्रतिशतले बढेको बिक्रेताहरुले बताएका छन् । कालिमाटी तरकारी बजारमा भित्रिएको मध्ये ३०÷४० मेट्रिक टन तरुल मात्रै बिक्री हुन बाँकी छ ।

तरुलको भाउ हिजो देखि घट्न थालेको छ । व्यापारीहरुका अनुसार पुस १५ देखि हिजो सम्म ७५÷८० मेट्रिक टन सखरखण्ड र ४०÷४५ मेट्रिक टन पिंडालु बिक्री भएको छ । गएका वर्षमा माघे संक्रान्तिमा मात्रै तरुल र पिंडालुको माग हुने गरेकोमा पछिल्लो समय आलुको विकल्पका रुपमा तरुल र पिंडालु प्रयोग गर्न थालिएकाले माग बढेको बिक्रेताहरुको भनाई छ । तरुल र पिंडालुको सिजन कार्तिकदेखि शुरु भई चैत्रको अन्त्य तिर सकिन्छ ।अनलाइन उज्यालो नेटवर्क