काठमाडौं, माघ १०,

अमेरिकी संसदले राष्ट्रपति बाराक ओबामाको प्रस्ताव स्वीकार गरेमा नेपालका लागि अमेरिकी राजदूत स्कट एच डेलिसीले अबको केही महिनामा नेपाल छोड्नु हुनेछ । नेपाल आएको दुई वर्ष पुग्न अझै दुई महिना बाँकी छँदा राष्ट्रपति बाराक ओबामाले उहाँलाई युगान्डाका लागि राजदूतका रुपमा प्रस्ताव गर्नुभएको छ ।

ओबामाले सोमबार उच्च अधिकारीहरुको हेरफेर गर्दै डेलिसिलाई युगान्डाका लागि राजदूतमा प्रस्ताव गर्नुभएको राष्ट्रपति कार्यालयले जनाएको छ । राष्ट्रपतिको प्रस्ताव अमेरिकी संसदले स्वीकृति जनाएपछि मात्रै लागू हुनेछ । डेलिसी सन् २०१० को मार्चदेखि नेपालका लागि राजदूतका रुपमा कार्यरत हुनुहुन्छ । अमेरिकी राजदुतको पदावधी एउटा देशमा तीन वर्ष हुने व्यवस्था छ ।

राजदुत डेलिसीले संसदले नयाँ भूमिकाका लागि आफूलाई स्विकृति दिएको खण्डमा निर्धारित समय भन्दा तीनवर्ष अघि नै नेपाल छोड्नुपरे आफुलाई दुख लाग्ने प्रतिक्रिया दिनुभएको छ । ‘सिनेटले यो प्रस्ताव स्वीकृत गरेमा तीन वर्षको अवधी नसकिँदै मैले नेपाल छोड्नुपर्छ’, आफ्नो फेसबुक पेजमा डेलिसीले लेख्नुभएको छ, ‘नेपाल छोड्न परेको खण्डमा म दुखी हुने छु ।’

डेलिसीले नेपाल र अमेरिकाबीचको भातृत्व, सहकार्य र हीत अभिवृद्धि गर्न आफू सँधैभरी सक्रिय रहने प्रतिवद्धता समेत गर्नुभएको छ । पछिल्लो समय सामाजिक सञ्जाल फेसबुक मार्फत राजनीतिक मुद्दामा विचार व्यक्त गरेपछि उहाँको आलोचना र टिका टिप्पँणी समेत भएको थियो । उहाँ फिर्ता भएमा कसलाई नेपालका लागि राजदुत पठाउने भन्ने बारे भने राष्ट्रपति कार्यालयले केही खुलाएको छैन ।उज्यालो नेटवर्क