जनसत्ताका कामलाई वैधानिकता दिने निर्णय फिर्ता नलिने माओवादी अडान I
Published on: Wednesday, January 25, 2012 //
समाचार
काठमाडौं, माघ १२,
पछिल्लो समय राजनीतिक दलहरुबीच बढेको विवाद समाधान गर्न बसेको तीन राजनीतिक दलको बैठक बिनानिष्कर्ष सकिएको छ । माओवादीले जनसत्ताको कामलाई वैद्यता दिने सरकारी निर्णय फिर्ता गर्न नमानेपछि बैठक निष्कर्षबिहिन बनेको हो ।
एकीकृत नेकपा माओवादीका अध्यक्ष पुष्पकमल दाहाल ‘प्रचण्ड’को निवास लाजिम्पाटमा बसेको बैठकमा तत्कालिन जनसत्ताको कामलाई मान्यता दिने सरकारी निर्णय फिर्ता गर्ने/ नगर्नेबारे कुरा मिल्न नसकेपछि तीन दलको बैठक बिनानिष्कर्ष सकिएको हो । सत्तारुढ माओवादी तथा विपक्षी कांग्रेस र एमाले पुरानै अडानमा रहँदा कुरा मिल्न नसकेको हो ।
माओवादीले जनसत्ताको कामलाई मान्यता दिने निर्णय फिर्ता गर्न नसकिने अडान लिएको छ । बैठकपछि माओवादी उपाध्यक्ष मोहन वैद्य ‘किरण’ले जनसत्ताको कामको वैद्यता विवादका कारण शान्ति र संविधान निर्माणको काम अघि नबढे त्यसको दोष कांग्रेस र एमालेलाई जाने बताउनुभयो । तीन दलको बैठक बस्नुअघि बसेको माओवादी पदाधिकारी बैठकले पनि जनसत्ताको कामलाई मान्यता दिने निर्णयकै कारण शान्ति र संविधानको कामलाई अप्ठेरोमा नपार्ने ठहर गरेको थियो । तीन दलको बैठकमा कांग्रेस र एमालेका नेताहरुले भने जनसत्ताको कामलाई वैद्यानिकता दिने निर्णय फिर्ता नहुँदासम्म अरु काम अघि नबढ्ने बताएका थिए ।
बैठकपछि एमालेका बरिष्ठ नेता माधवकुमार नेपालले सरकारले शान्ति सम्झौता विपरित गरेको निर्णय फिर्ता नहुँदासम्म शान्ति र संविधान निर्माणको काम अघि बढ्न नसक्ने तथा संसद बैठक पनि अवरुद्ध नै हुने बताउनुभयो । कांग्रेस नेता डा. रामशरण महतले अब, बल सरकार र माओवादीको कोर्टमा रहेको टिप्पणी गर्नुभयो ।
यसैबीच अहिले सत्तारुढ माओवादी र मधेसी मोर्चाबीच प्रधानमन्त्री निवास बालुवाटारमा छलफल हुँदैछ । कमल पराजुली/ उज्यालो नेटवर्क ।
