काठमाडौं, मंसिर ७,

नेपालबाट फेसबुकमा जस्तै सम्पूर्ण सुविधासहितको अर्को सामाजिक सञ्जाल वेबसाइट सँगालो डट कम सञ्चालनमा आएको छ ।पि्रिन्सटन मिडियाले यस्तो वेबसाइट विकास गरी सार्वजनिक गरेको हो । यसमा प्रयोगकर्ताको गोपनीयतालाई जोड दिइएको कम्पनीका निर्देशक सुलोचना कर्माचार्यले बताइन् । उक्त साइटमा अकाउन्ट र वाल पोस्टिङमा फरक फरक ढंगले गोपनीयता सेट गर्न सकिने सुविधा छ ।

उक्त वेबसाइटमा वाल पोस्टिङ, ग्रुप च्याट, प्राइभेट च्याट, भिडियो, संगीत लगायत प्रयोगकर्ताले आफ्ना सूचनाहरू पोस्ट गर्न सक्छन् । त्यसैगरी ग्रुप बनाउने, पेज बनाउने लगायत सुविधा छन् । यसमा प्वाइन्ट्स, किनबेच र उपहारको थप सुविधा छ । प्रयोगकर्ताले रजिस्ट्रेसन गरिसके पछि साइटमा गर्ने क्रियाकलापका आधारमा प्वाइन्ट थपिँदै जान्छ । ती प्वाइन्टलाई प्रगयोगकर्ताले गिफ्ट पठाउने लगायत प्रायोजनका लागि प्रयोग गर्न सक्छन् ।

त्यस्तै गरी प्रयोगकर्ताले अन्य प्रयोगकर्ताका सामान किन्न र आफ्नो सामान बिक्रीका लागि राख्न सक्छन् । सँगालोमा तीन लेबलका युजर रहेको कर्माचार्यले बताइन् । रजिस्ट्रर गर्ने बित्तिकै युजर साधारण लेबलमा प्रवेश गर्छ । त्यसपछि युजरको क्रियाकलाप र प्वाइन्ट्स आर्जनसँगै स्मार्ट र एड्वान्स लेबलमा प्रवेश गर्न सक्छ । उनका अनुसार एड्भान्स लेबलमा प्रयोगकर्ताले विज्ञापन रहित सुविधाहरूको उपभोग गर्न पाउँछ ।

परीक्षणसहित बाहिर ल्याइएको यो वेबसाइट एकैचोटि १० हजार भन्दा बढीले चलाउन सक्ने कम्पनीले जनाएको छ । सञ्चालमा आएको एक महिना अगावै ६ सय ३० सदस्य भएको मार्केटिङ म्यानेजर सुमन श्रेष्ठले जानकारी दिए ।

श्रेष्ठले वेबसाइटलाई यूजर फ्रेण्डली बनाउन हाल अमेरिकामा रहँदै आएको होस्टिङ नेपालबाटै गर्ने तयारी रहेको जानकारी दिए ।