काठमाण्डौ, आगामी फेब्रुअरी १७ अर्थात भ्यालेनटाईन विकमा नेपालभरका अधिकांश सिनेमा घरमा सार्वजनिक हुन लागेको बहुप्रतिक्षित चलचित्र 'मिस यू' को 'हाम्रो सम्बन्ध...' बोलको गीत वर्ल्ड प्रिमियर गरिएको छ ।

'मेरो एउटा साथी छ' पछि ठूलो पर्दामा नदेखिएकी नायिका नम्रता श्रेष्ठ र पहिलो पटक पर्दामा देखिन लागेका मोडल बरूण राणा अभिनित प्रिमियर गीतमा किचमान चित्रकारको शब्द संगीत रहेको छ भने किचमानलाई गायिका प्रकृती गिरीले साथ दिएकी छिन् । गत पौष ५ गतेका दिन यहि गीतको अडियो फिल्मीखबरबाट सार्वजनिक गरिएको थियो । अडियो गीतलाई धेरैले रूचाए पछि यसैको भिडियो सार्वजनिक गरिएको निर्देशक सुरेश दर्पण पोखरेलले बताए ।

सार्वजनिक गीतमा मलेसियाका सुन्दर ठाउँहरूलाई क्यामेराम्यान धिरज जंग शाहले सुन्दर ढंगले खिचेका छन् । गीतको करियोग्राफी निर्देशक पोखरेलले आफैं गरेका हुन् । गीत सँगै नयाँ प्रोमो पनि सार्वजनिक गरिएको छ । प्रोमोमा नायिका नम्रता श्रेष्ठलाई She is back भनिएको छ । नायक दिलिप रायमाझीको पनि मुख्य अभिनय रहेको चलचित्र 'मिस यू' लाई नायक रायमाझीले नै निर्माण गरेका हुन् । त्रिकोणात्मक प्रेमकथामा आधारित उक्त चलचित्रको कथा सुरज सुब्बा 'नाल्बो' ले लेखेका हुन् ।फिल्मीखबर