काठमाण्डौ, माघ १३,

व्यवस्थापिका संसदको प्राकृतिक स्रोत साधन समितिका सदस्यहरूले पटक पटक प्रधानमन्त्री डा. बाबुराम भट्टराई समितिको बैठकमा अनुपस्थित हुनुभएकोमा आपत्ति जनाएका छन् । गएको ९ गते प्रधानमन्त्री आफैले आजका लागि बोलाउन लगाएर फेरि अनुपस्थित हुनुभएकोले सभासद्हरू आक्रोसित भएका हुन् ।

चुरे क्षेत्रबाट ढुङ्गा, गिट्टी र बालुवा निकासी नरोकिएकोले त्यसबारे छलफलका लागि समितिले आज प्रधानमन्त्रीलगायत विभिन्न पाँचजना मन्त्रीहरुलाई बोलाएको थियो । समिति बैठकमा तीन जना मन्त्रीहरू मात्रै उपस्थित भएका थिए । सभासद् रत्न गुरुङले राष्ट्रिय सरोकारको विषयमा सरकार प्रमुखबाट बेवास्ता गरिनु दुःखलाग्दो भएको बताउनुभयो ।