अमेरिकी दूतलाई पाकिस्तानमा अस्वीकार I
Published on: Wednesday, January 18, 2012 //
बिश्वमा
इस्लामावाद, माघ ५,(एजेन्सी)
अमेरिकी विशेषदूत मार्क ग्रोसम्यानलाई भ्रमण अनुमति दिन पाकिस्तानले अस्वीकार गरेको छ। 'विशेष दूत ग्रोसम्यानले भ्रमण अनुमतिका लागि अनुरोध गरेका थिए,' पाकिस्तानका एक वरिष्ठ अधिकारीले भने, 'अहिलेको अवस्थामा भ्रमण हुन नसक्ने सन्देश दिएका छौं।'
अफगानिस्तान तथा पाकिस्तानका लागि अमेरिकी विशेष दूत ग्रोसम्यानले तालिबानलाई शान्ति वार्तामा ल्याउने विषयमा छलफल गर्न यसै साता कतार, संयुक्त अरब इमिरेट्स (युएइ) र अफगानिस्तानको भ्रमण गर्ने कार्यक्रम छ।अफगानिस्तानमा तैनाथ पश्चिमा देशका सैनिकविरुद्ध लड्दै आएका तालिबान विद्रोहीलाई मूलधारमा ल्याउने प्रक्रियामा पाकिस्तानको भूमिका महŒवपूर्ण हुनेछ। पश्चिमा राष्ट्रका सैनिकले सन् २०१४ अन्त्यसम्म अफगानिस्तान छाड्दैछन्।
अमेरिकी विदेश मन्त्रालयका प्रवक्ता मार्क टोनेरले अमेरिका-पाकिस्तान द्वीपक्षीय सम्बन्धबारे पाकिस्तानी संसदबाट कुनै निर्णय नहुन्जेल ग्रोसम्यानलाई अनुमति दिन नसकिने जानकारी गत साता पाकिस्तानबाट आएको बताए। पाकिस्तानले डिसेम्बर सुरुमै अमेरिका तथा उत्तर एटलान्टिक सन्धि संगठन (नेटो) सँगको सहकार्यबारे समीक्षा गर्ने निर्णय भएको बताएको थियो। अहिले संसदमा त्यस विषयमा छलफल भैरहे पनि सरकारलाई यसबारे कहिले सिफारिस गर्ने भन्ने टुंगो छैन।
नोभेम्बरमा नेटोको सैनिक कारबाहीमा २४ पाकिस्तानी सैनिकको मृत्यु भएपछि अमेरिका र पाकिस्तानबीचको सम्बन्ध निकै चिसिएको छ। गत वर्ष जनवरीमा सिआइएका एक कन्ट्र्याक्टरले दुई पाकिस्तानीको हत्या गरेपछि वासिङ्टन र इस्लामावादबीचको सम्बन्धमा तनाव सिर्जना भएको थियो।
मेमा कुनै सूचनै नदिई पाकिस्तानभित्र प्रवेश गरेर अमेरिकी विशेष सैनिक टोलीले अलकायदाका प्रमुख ओसामा बिन लादेनको हत्या गरेपछि दुई देशबीचको सम्बन्ध निकै बिग्रिएको थियो। उक्त घटनाले पाकिस्तानको शक्तिशाली सेनालाई थप आक्रोशित पारेको थियो। पाकिस्तानले उक्त कारबाहीबाट देशको सार्वभौमिकता उल्लंघन भएको बताउँदै आएको छ।
