बम विष्फोटनमा सात जनाको ज्यान गयो, ५० भन्दा बढी घाईते I
Published on: Friday, January 20, 2012 //
बिश्वमा
एजेन्सी, माघ ७,
नाईजेरियाको कानो शहरमा प्रहरी कार्यालय लगायत महत्वपूर्ण ठाउँमा श्रृंखलावद्ध बम विष्फोट हुँदा कम्तीमा सात जनाको ज्यान गएको छ । बम विष्फोटमा ५० जना भन्दा बढी घाईते भएका छन् ।
प्रहरी मुख्यालय, दुई वटा प्रहरी चौकी र आप्रवासन कार्यालयमा बम विष्फोट र गोली हानाहान भएको नाइजेरियाका अधिकारीहरुलाई उद्धृत गर्दै अन्तर्राष्ट्रिय सञ्चारमाध्यमहरुले जनाएका छन् । ज्यान गुमाउनेमा तीन जना सरकारी उच्च अधिकारी समेत रहेको बताईएको छ ।
घटनापछि स्थानीय प्रशासनले कानो शहरमा कर्फ्यूको घोषणा गरेको छ । विष्फोटको जिम्मेवारी ईस्लामिक आतंकवादी संगठन बोको हरामले लिएको छ । संगठनका प्रवक्ताले प्रहरी हिरासतमा रहेका आफ्ना कार्यकर्ता रिहाई गर्न सरकारले अस्वीकार गरेकाले विष्फोट गराएको बताएका छन् ।
पछिल्लो समय बोको हरामले नाईजेरियाको उत्तरी क्षेत्रमा हिंसात्मक गतिबिधी तिव्र पारेको छ । विशेष गरी ईशाई धर्माबलम्बीहरुलाई लक्षित गरी आक्रमण भएपछि हजारौं नागरिकले देश छाडेका छन् । -एजेन्सीको सहयोगमा
