इंग्ल्यान्ड अब नम्बर एक
Published on: Saturday, August 13, 2011 //
खेलकुद
एएफपी,
बर्मिङ्घम, श्रावण २९ - जेम्स एन्डरसनले चार विकेट लिएपछि इंग्ल्यान्डले शनिबार भारतलाई एजबास्टनमा एक इनिङ र २ सय ४२ ले हरायो र टेस्ट क्रिकेटमा नम्बर एक टिम बन्यो । इंग्ल्यान्डले चार दिनभित्र लगातार जित हात पारेको यो दोस्रो टेस्ट हो । तेस्रो टेस्टको सफलताले इंग्ल्यान्डले चार खेलको शृङ्खलामा ३-० को अग्रता लियो ।
शृङ्खलामा कम्तीमा दुई स्पष्ट अन्तरको जित हात पार्ने निश्चित भएपछि इंग्ल्यान्ड भारतलाई उछिनेर शीर्ष स्थानमा पुगेको हो । सन् २००३ देखि टेस्ट वरीयताको प्रलचन सुरु भएयता इंग्ल्यान्ड शीर्ष स्थानमा उक्लेको यो पहिलोपल्ट हो । भारत तेस्रो टेस्टको आपmनो दोस्रो इनिङमा २ सय ४४ रनमा अलआउट भयो ।
यसअघि इंग्ल्यान्डले एलिस्टर कुकको उत्कृष्ट २ सय ९४ रन मदतले सात विकेटमा ७ सय १० रन बनाएर इनिङ समाप्तिको घोषणा गरेको थियो । टेस्ट क्रिकेटमा ७३ वर्षयता इंग्ल्यान्डको यो सर्वाधिक ठूलो स्कोर हो । माथिल्लो क्रममा सचिन तेन्दुलकरले मात्र केही सुदृढ प्रदर्शन गरे र ४० रन बनाए ।
कप्तान महेन्द्रसिंह धोनी ७४ रन बनाएर नटआउट भए । उनले प्रवीणकुमारसँग आठौं विकेटका लागि ७५ रनको साझेदारी गरे । प्रवीणले ४० रन बनाए र यो उनको उत्कृष्ट व्यक्तिगत स्कोर हो । भारतले एक विकेट गुमाएर ३५ रनबाट अगाडि खेल्न सुरु गरेको थियो ।
लन्चसम्म पुग्दा भारत छ विकेट गुमाएर १ सय १६ रनको स्थितिमा थियो । उसले बिहानको खेलमा ८१ रन बनाएर पाँच विकेट गुमाएको थियो । दोस्रो सत्रको खेल सुरु हुनेबित्तिकै भारतको स्थिति सात विकेट गुमाएर १ सय ३० रनमा पुग्यो । अब चौथो तथा अन्तिम टेस्ट बिहीबार ओभलमा बिहीबार सुरु हुनेछ ।
