काठमाडौ, श्रावण १९ - पाकिस्तान पहिलो साफ यू-१६ च्याम्पियनसिप फुटबलमा बुधबार सेमिफाइनल प्रवेश गरेको छ । उसले समूह चरणको एकतर्फी दोस्रो खेलमा माल्दिभ्सलाई ६-० ले हरायो । दुवै खेलमा जित दर्ता गरेको पाकिस्तान समूह 'ए' को विजेतासमेत बन्यो । उसको ६ अंक भयो । त्यस समूहमा रहेका भारत र माल्दिभ्स दुवैले पाकिस्तानसँग पराजय बेहोरेका छन् । भारत र माल्दिभ्सबीचको विजेता टिम त्यस समूहबाट उपविजेताको हैसियतमा अन्तिम चारमा प्रवेश गर्नेछ । पाकिस्तानका लागि मोहम्मद बिलालले ४ गोल गरे । थप दुई गोल शेर अलीको नाममा रह्यो ।

पाकिस्तानका प्रशिक्षक साजाद मेहमुदले माल्दिभ्सलाई ठूलो अन्तरले हराउन सक्ने पहिले नै सोचेको बताए । मेहमुदले सेमिफाइनलमा समूह 'बी' बाट कुनै टिमसँग खेल्नुपरे पनि नडराउने बताए ।माल्दिभ्सका प्रशिक्षक अब्दुल गहानीले खराब मैदानका कारण खेलाडीले खेल्न नसकेको बताए । साथै उनले एन्फाले खराब व्यवस्थापन गरेको बताए । गहानीले पाकिस्तानी टिमले राम्रो खेलेको बताए ।

खेलको ६ मध्ये ५ गोल दोस्रो हाफमा सम्भव भए । पाकिस्तानले खेलको पूरै अवधि माल्दिभ्सलाई दबाबमा राखेको थियो । शारीरिक रूपमा माल्दिभ्सभन्दा ठूला र बलिया रहेका पाकिस्तानी खेलाडीले दबाब झेल्नु परेन । बिलालले ५ औं मिनेटमा मन्सुर खानको पासमा हेड गर्दै पाकिस्तानलाई अग्रता दिलाए । त्यसपछि माल्दिभ्सले विपक्षी पोस्टमा कुनै आक्रमण गर्न नसके पनि पाकिस्तानलाई थप गोल गर्न दिएन । तर दोस्रो हाफमा माल्दिभ्सका खेलाडी पूरै थाकेका देखिए । जसको मौका पाकिस्तानी खेलाडीले पूर्णरूपमा उठाए । बिलालले ५६ औं मिनेटमा दोस्रो गोल गरे । उनले अलीको पासमा हेडमार्फत् गोल गरे । अलीले ७९ औं मिनेटमा सनैउलाहको पासमा डि-बक्स भित्रबाट बललाई जाली चुमाए ।

त्यसको एक मिनेट बित्न नपाउँदै उनले व्यक्तिगत दोस्रो गोल गरे । अलीले दुई डिफेन्डर र गोलकिपरलाई छक्याउँदै बललाई पोस्टको दिशा दिए । अली ह्याटि्रक गर्नबाट एकपल्ट चुके भने अर्कोपल्ट विपक्षी गोलकिपर बाधक बने । त्यसपछि फेरि बिलाल चम्किए । उनले एक्लो प्रयासमा ८४ औं मिनेटमा डि-बक्सबाट उत्कृष्ट गोल गरे र ह्याटि्रक पूरा गरे । बिलालले व्यक्तिगत चौथो र टिमको छैटौं गोल खेलको अन्तिम मिनेटमा गरे ।

देश खेल जित हार बराबरी अंक

पाकिस्तान २ २ ० ० ६

भारत १ ० १ ० ०

माल्दिभ्स १ ० १ ० ०

घरेलु टिम नेपालले पहिलो साफ यू-१९ च्याम्पियनसिप फुटबलमा बिहीबार दशरथ रंगशालामा बंगलादेशको सामना गर्दै छ । पहिलो खेलमा श्रीलंकालाई निराश पारेको बंगलादेशसँग खेल्न नेपाली टिमलाई सहज भने हुने छैन ।

तर घरेलु मैदान र समर्थकको अघि प्रतियोगिताको मुख्य दाबेदारका रूपमा हेरिएको नेपाली खेलाडीको प्रदर्शनमाथि सबैको आँखा रहनेछ । नेपाली टिमका प्रशिक्षक सुनिल श्रेष्ठले बंगलादेशलाई पराजित गरेर विजयी सुरुआत गर्ने बताए । 'खेलाडीको मनोबल उच्च छ,' उनले भने, 'टिमको फरवार्ड, मिडफिल्ड र डिफेन्स सबै पक्ष राम्रो छ ।'

तर श्रेष्ठले बंगलादेशलाई सहज रूपमा नलिने बताए । 'बंगलादेश टिम प्राविधिक रूपमा राम्रो रहेनछ,' उनले भने, 'बंगलादेशका चार खेलाडी राम्रा छन् । उनीहरूलाई रोक्ने राम्रो लक्ष्य हो ।' बंगलादेशका प्रशिक्षक टोटम सेक सुकुलले नेपाल बलियो टिम रहेको बताएका छन् । घरेलु टिमलाई कडा चुनौती दिने उनले बताए ।

नेपालविरुद्ध बंगलादेश