शीर्ष वरीयतालाई सफलता
Published on: Monday, August 15, 2011 //
खेलकुद
काठमाडौ, श्रावण ३१ - सोनाक्षी कप प्रथम राष्ट्रिय लिग टेबलटेनिस र्याङकिङको पहिलो दिन सोमबार महिला र पुरुष दुवैतर्फ अपेक्षाअनुसार शीर्ष वरीयताका खेलाडी विजयी रहे । महिलातर्फ शीर्ष चार स्थानमा रहेका नेपाल च्याम्पियन नविता श्रेष्ठ, स्वेच्छा नेम्वाङ, एलिना महर्जन र रेणुका खत्री सबैले चार खेल जिते । चारै खेल जित्नेमा १० औं वरीयताकी काजोल रौनियार पनि रहिन् । पुरुषतर्फ शीर्ष तीनमा रहेका नेपाल च्याम्पियन शिवसुन्दर गोथे, अजय सुवाल र राजेन्द्र कपालीले सबै चार खेल जिते । खराब प्रकाशका कारण दिनको अन्तिम चार खेल रद्द भए । चोटबाट मुक्त हुँदै लयमा र्फकन प्रयास गरिरहेका शिवसुन्दरले जितका लागि संघर्ष भने गर्नुपरेन ।
नविताले पहिलो जितका लागि संघर्ष गरिन् भने स्वेच्छाले अन्तिम खेलमा । नवितालाई २० स्थानकी नोर्देन तामाङले बलियो चुनौती पेस गरिन् । त्यो खेल नविताको नाममा ११-४, ११-२, ८-११, ५-११ र ११-७ ले रह्यो । 'सुरुमा स्थितिसँग अभ्यस्त हुन समय लाग्यो,' नविताले भनिन्, 'त्यसयता गार्हो भएन । अन्तिम तीन खेलमा नविताले मनीता चित्रकार, एरिका महर्जन र गोमा गौतमलाई हराइन् । स्वेच्छाले भने दिनको आपmनो अन्तिम खेलमा सनिशा श्रेष्ठमाथि ११-६, ९-११, ११-९, ६-११, १२-१० को जित निकालिन् । त्यसअघि उनले मनीता चित्रकार, गोमा गौतम र सविना माखास्यालाई हराएकी थिइन् ।
'अन्तिम खेलमा मिहिनेत गर्नु पर्यो, आउने खेलहरूमा राम्रो प्रदर्शन गर्नेछु,' स्वेच्छाले भनिन् । काजोलले आफूभन्दा तीन स्थानमाथिकी रविना देसारलाई दिनको सर्वाधिक लामो खेलमा १२-१४, ११-९, १७-१५, ७-११ र १४-१२ ले हराइन् । शिवसुन्दरले विवेक गौतम, गणेश तामाङ र पीयूष अवाललाई हराए ।
'विस्तारै पुरानो लय समात्ने प्रयासमा छु, आउने खेलमा राम्रो प्रदर्शन कायम राख्ने प्रयास गर्ने छु,' शिवसुन्दरले भने । यस्तै अजयले गणेश तामाङ, विनेश खनिया, प्रदीप रोक्का र सोनु गुप्तालाई हराए । राजेन्द्रले पीयूष अवाल, राकेश महर्जन, सुनील महर्जन र विवेक कार्कीलाई पराजित गरे ।
दिनको 'अपसेट' नतिजामा सोनु गुप्ताले चौथो वरीयताका चन्दन शाहीलाई ११-९, ६-११, ११-९, २-११ र ११-५ तथा प्रदीप रोक्काले छैटौं वरीयताका पुरुषोत्तम वज्राचार्यलाई १३-११, ११-६ र ११-८ ले हराए । - कान्तिपुर
