जात स्त्री पुरुष र उभय मात्र हुन् –पुजना
Published on: Saturday, July 23, 2011 //
अन्तर्वार्ता
फिल्म श्रीमान् किन यति धेरै चर्चित भएको हो ?
कथावस्तु राम्रो भएकैले यसले चर्चा पाएको हो । नेपाली फिल्म उद्योग संकटमा परिरहेको बेलामा यसले राम्रो व्यापार गरिरहेको छ । अहिले देशका विभिन्न हलमा तेस्रो हप्ता पूरा गरी चौथो हप्तामा प्रदर्शन भइरहेको छ । दर्शक पाइरहेकै छ ।
कलाकार राम्रा भएर हो कि कथा राम्रो भएर यति चलेको ?
कथा राम्रो नभएमा कलाकारले मात्र राम्रो प्रस्तुति दिएर हुँदैन । यसमा कथा उतिकै राम्रो छ । कलाकारले पनि राम्रो प्रस्तुति गरेका छन् । दर्पणछाँयापछिको सर्वाधिक मन पराएको फिल्म हो यो ।
कसले भन्छ त्यस्तो ?
दर्शकले । उनीहरुनै हुन फिल्म जाँच्ने । मिडियाले पनि फिल्मको स्तरलाई चर्चाको विषय बनाएका छन् ।
नेपाली कलाकार निर्देशक निर्माता कुनै फिल्मभन्दा एक दिन मात्र बढी चले यस्तो दाबी गर्छन् तपाइँको दाबी पनि यस्तै हो कि
फिल्म राम्रो नभए हामीले दाबी गरेर मात्र हुने केही होइन । त्यसैले फिल्म राम्रो-नराम्रो दर्शकले नै छुट्टाउछन् । स्तरीय फिल्म नबन्दा नेपाली फिल्मले धेरै दर्शक गुमाए । यही फिल्मले पुराना दर्शक पुनः हलमा भित्र्याउदैछन् । यसैमा म खुसी छु ।
कलाकारले पनि फिल्म बजार पनि बुझ्नुपर्ने रहेछ हगि ?
एकदम बुझ्नुपर्छ । फिल्म बजार नै नबुझेमा कलाकारले अभिनय गर्नुको के अर्थ रह्यो र
फिल्म राम्रो भएरै तपाइँको प्रशंसा पनि उतिकै भइरहेको छ नि हैन ?
हो यही फिल्ममा मैले राम्रो भुमिका पनि पाएकी थिए । अन्य फिल्ममा भन्दा पृथक भुमिका पाएकी थिएँ । राम्रो अभिनय गरेँ । फिल्म राम्रो भयो । फिल्म राम्रो भएपछि कलाकारले जस पाउने नै भयो । यसकै प्रमोशनका लागि हामी पोखरा वुटवल नेपालगाज धरान पुगे । सबैतिर यो फिल्म हेर्नेको भींड देखिन्थ्यो ।
अब आउने फिल्म के कस्ता छन् ?
तिर्खा द निर्मला रिलिज हुने क्रममा छन् । यी फिल्ममा पनि नेपाली मौलिक कथावस्तु समेटिएका छन् ।
अहिले हात लागेको फिल्म ?
तिम्रो कसमु मा अभिनय गरिरहेकी छु । श्रीमानको प्रमोशनको लागि बहिर जानुपरेकोले केही दिन सुटिङ रोकिएको छ । दुइहप्तापछि यसको काम पनि सकिन्छ ।
तपाइँ त हेलो पनि भन्नहुन्न किन हो ?
म जयसंगतमा लागेकी छु । साँढे तीन वर्ष जति भयो यता आएको ।
किन लाग्नुभएको नि ?
एकदिन बुझ्ने मौका पाएँ । राम्रो लाग्यो । त्यसैले यसमै आएकी ।
जयसंगतले के भन्छ ?
अहिले मानिसले विभिन्न जात बनाएर जातीय विभेदको सिर्जना गरिरहेका छन् । यसो गर्नु ठिक होइन किनभने संसारका मानिस तीन जात मात्र छन् । हरेक पुरुषले आफ्नो थर पुरुष महिलाले स्त्री र तेस्रोिलंगीले उभय राख्नुपर्छ । जयसंगतको यही सिद्धान्त छ । यसमा पाँचवटा योग पनि भएकोले हामीलाई स्वस्थ रहन मद्दत गर्छ । माछा मासु नखाने आध्यात्मिक बन्ने यस्तै त हो नि ।
यसमा लागेर पाइने फाइदा ?
समाजमा उदहरणीय बन्ने । भगवानको नजिक पुग्न सकिन्छ । जयसंगतमा लागेका मानिसबाट धेरै कुरा सिक्न सकिन्छ ।
तपाइँबाट पनि सिक्न सकिन्छ त्यसो भए ।
म त सिक्दैछु आफुलाई सुधार्दै छु । आध्यात्मिक बन्दैछु । केही समयपछि पक्कै मबाट पनि सिक्न सकिन्छ होला ।
भौतिक वस्तुलाई जयसंगतले के भन्छ ?
आध्यात्मि र भौतिक एकअर्काका परिपुरक हुन् ।
जयसंगतमा लाग्न के गर्नुपर्छ ?
बत्तीसपुतलीमा आश्रम छ । इच्छा भएका आउन सक्छन् र बुझेर राम्रो लागेमा नौं दिनको प्याकेज लिन सक्छन् ।
पैसा कति लाग्छ नि ?
पैसा लाग्दैन ।
यसमा लागेपछि आफ्नो पेशा छड्नुपर्दैन ?
पर्दैन झन राम्रोसँग काम गर्न सकिन्छ । आध्यात्मिक भइन्छ । यस्तो भएपछि त समाजमा उदहरणीय बन्ने हो । सबैले विश्वास गर्ने हो ।
हाम्रो समाजमा पुरोहितलाई आध्यात्मिक भन्छन् । तर कतिपय नेपाली फिल्ममा त पुरोहितलाई भिलेनका रुपमा देखाउँछन् नि ।
त्यो वास्तविक हो । पुरोहित आध्यात्मिक हुदैँनन् । उनीहरुले त पुरेत्याइ गर्नुपर्ने काम मात्र पुरा गर्छन् । पुरोहित बनेर समाजमा नराम्रो गरी बस्नुले नै नेपाली फिल्ममा पनि उनीहरु भिलेनका रुपमा आएका हुन ।
तपाइँ त अमेरिका पनि घुम्नु भएको हो नि हैन ?
म २ वर्ष अघि घुमेकी थिएँ । टेक्सास् लस् एन्जल्स बाल्टिमोर गरी विभिन्न १२ ठाउँमा स्टेज प्रोग्राम गरी फर्केकी हँु ।
श्रीमान फिल्म ल्याएर आउनु हुन्छ कि ?
सबैको माया पाइरहेकै छु । अझै बढी माया गर्नुहोला र सहयोग पाएमा त्यहाँसम्म पुगी श्रीमान फिल्म देखाउने धोको छ ।
