काठमाडौ, अषाढ १३ - दुई वर्षभन्दा बढी प्रतीक्षा गरेका नेपालीले अब संसारकै सस्तो नानो कार किन्न पाउने भएका छन् । नेपालका लागि यसको आधिकारिक बिक्रेता सिप्रदी ट्रेडिङले आइतबारदेखि कारको बुकिङ खुला गरेको छ ।

राजधानीमा एक कार्यक्रम आयोजना गरी नेपालमा आधिकारिक रूपमा भित्रिएको नानोको आगामी १० दिनसम्म बुकिङ खुला रहने ट्रेडिङका अध्यक्ष सिद्धार्थशमशेर राणाले बताए । 'अबको १० दिनसम्म देशभरका १४ वटा सोरुममा बुक गर्न सकिन्छ,' उनले भने ।

नेपाल आइपुग्दा भन्सारमा लाग्ने विभिन्न शुल्कका कारण भारतीयभन्दा यहाँका ग्राहकले धेरै रकम खर्चिनुपर्ने भएको छ । नानाको सबैभन्दा कम सुविधा भएको स्ट्यान्डर्ड नानो कारको मूल्य नेपाली बजारमा ७ लाख ९८ हजार रुपैयाँ तोकिएको छ । यसैगरी सेमी अप्सन नानो सिएक्सको ९ लाख ९८ हजार र फुल अप्सन नानो एलएक्सको मूल्य ११ लाख ७८ हजार रुपैयाँ तोकिएको छ । 'विभिन्न शुल्कका कारण यहाँ बढी मूल्य परेको हो,' टाटा मोटर्सका वैदेशिक व्यापार प्रमुख जोनी ओम्मनले भने, 'तर पनि नानोले यहाँका ग्राहकलाई सन्तुष्टि दिने छ ।'

सन् २००८ देखि भारतीय बजारमा आएको नानोका ९० प्रतिशत ग्राहक सन्तुष्ट रहेको दाबी ओम्मनको छ । नानो स्ट्यान्डर्ड बुकिङ गर्न १० हजार, नानो सिएक्सका लागि २० हजार र एलएक्सका लागि ३० हजार बुझाउनुपर्ने सिप्रदीले जनाएको छ । 'अहिले बुकिङ भएका गाडी जुलाई अन्त्यसम्म ग्राहकले पाइसक्ने छन्,' ओम्मनले भने । कार किन्न फाइनान्सको सुविधा लागि विभिन्न १० बैंकसँग सहकार्यको भइरहेको सिप्रदीका प्रमुख कार्यकारी अधिकृत शम्भुप्रसाद दाहालले जानकारी दिए । नानो स्ट्यान्डर्डका लागि मासिक किस्ता ११ हजार १ सय ११ पर्ने दाहालले बताए । सुरुमा भुक्तान गर्ने रकम र भुक्तानी अवधिले यो रकम तलमाथि हुन सक्ने पनि कम्पनीले जनाएको छ ।

नेपालमा औपचारिक प्रवेश गराउनुपूर्व टाटाले नानो यात्रा नाम दिएर दुई कारलाई देशका विभिन्न भागमा घुमाएको थियो । कम्पनीका अनुसार हालसम्म ६ हजार किलोमिटर नेपालको यात्रा गरिसकेको छ । अध्यक्ष राणाका अनुसार नानोले नेपालको ४० हजार किलोमिटर यात्रा गर्नेछ ।

नेपालमा र संसारका अन्य कठिन भूभागमा पनि गुडिसकेकाले कार सुरक्ष्ाित र बढी माइलेज दिने दाबी ओम्मनको छ । 'संसारकै कठिन सडकमा पनि गुडिसकेकाले ढुक्क हुन सकिन्छ,' उनले भने, 'हामीले ४ वर्ष अथवा ९० हजार किलोमिटरसम्मको वारेन्टी पनि दिएका छौं, यति धेरै वारेन्ट हामी कारप्रति विश्वस्त भएर नै दिएका हौं ।' ६ सय २४ सिसीको नानो कारले प्रतिलिटर २३ किलोमिटर माइलेज दिने पनि ओम्मनले जानकारी

दिए । बाहिरबाट अन्य कारभन्दा सानो देखिए पनि भित्र २१ प्रतिशत बढी ठाउँ भएको उनले बताए । जमिनबाट १ दशमलव ८३ मिमिमाथि भएकाले कच्ची सडकका लागि पनि उपयुक्त हुने दाबी ओम्मनको छ । '४ मिटर वृत्तमा घुम्न सक्ने यस कारको अत्यधिक गति १ सय ५ किलोमिटर छ,' उनले भने । यसका नेपालमा ९ वटा सर्भिस सेन्टर रहेको जनाइएको छ । सिप्रदीले ४० वर्षदेखि नेपालमा टाटा गाडी बेच्दै आएको छ ।

साभार - इ. कान्तिपुर