पर्सा, पुस १८,

देशविदेशका धेरै कुना डुलिसकेकी अन्जु पन्तले स्वदेशकै यो दक्षिणी कुनो यसअघि टेक्न पाएकी थिइनन् । आफू अन्यत्रका किशोर र युवाहरूको मात्रै मुटुको धड्कन नरहेको कुरो उनले सायद यो औद्योगिक नगरीमा कसन्र्टपछि बुझिन् । कार्यक्रम सञ्चालकद्वारा 'नेपाली आशा भोसले' र 'युवाहरूको आइकन' को रूपमा चित्रित अन्जुले यी उपमा प्रमाणित गर्न कुनै कसर बाँकी राखिनन् । वीरगन्जमा जारी अन्तर्राष्ट्रिय व्यापार मेलामा शनिबार अरू दिनभन्दा बढी भिड थियो । अन्जुलाई सुन्न सबै उमेर समूहका गरी करिब १५ हजार फ्यान प्रतीक्षारत थिए ।

मञ्चमा आएपछि अन्जुले स्थानीय फ्यानहरूको मनस्थिति बुझेरै बहुचर्चित गीत सुनाइन्- 'न बिर्सें तिमीलाई न पाएँ तिमीलाई...' । श्रोताहरूसँग बीचबीचमा वार्तालाप गर्दै दिइएको प्रस्तुतिले प्रायःको मन जित्यो । ओठ र हात हल्लाएर उनलाई साथ दिनेमा टिनएजरदेखि बुढी आमैहरूसम्म पनि थिए । लगत्तै उनले 'कहाँ भेटिएला' फिल्मको शीर्ष गीत सुनाइन् । अब फ्यानहरूले नाच्न चाहेको कुरो बुझेकी उनले त्यसमा पुरै जोड लगाइन् । त्यो काम फत्ते गर्‍यो 'यो हो मेरो प्राणभन्दा प्यारो माइतीघर, माइतीघर माइतीघर...' को रिमिक्सले । सबैजसो श्रोताहरू नाच्न थाले । आफूलाई अन्जुकी डाइहार्ट फ्यान बताउने एउटी युवती मञ्चमै उक्लिइन् । माहोल झनै रमाइलो भयो । अन्जुले 'वनमा फुल्यो फूलै फूल...,' 'तिर्खा लाग्यो पानी खाएँ...,' 'नकच्चरो दाइलाई चड्काइदेऊ चड्काइदेऊ गालैमा...,' 'सागरसरी चोखो माया...' जस्ता अन्य चर्चित गीत पनि सुनाइन् ।

अन्जुको प्रस्तुतिपछि मञ्च सम्हाल्यो रवि डंगोल -बेमान), पूर्ण थापा -सुब्बा दाजु) र जानुका केसी -पुतली) को टोलीले । सम्बन्ध विच्छेद गर्न चाहने दम्पतीको भूमिकामा देखा परेका पूर्ण र जानुकालाई वकिलको रूपमा प्रस्तुत भएका रविले रोचक शैलीमा कानुनी परामर्श दिएर श्रोताहरूलाई हँसाउनु हँसाए । कसैकसैलाई रुवाए पनि । कतिपयले हाँसोसँग आँसु पनि लुकाउन सकेनन् ।

प्रहसनपछि पालो फेरि गीतकै । सनुप पौडेलले 'सम्झना आइदिन्छ आँखामा...' र 'मेरो देश...' सुनाए । फ्यानहरूको आग्रहमा उनले स्थानीय ब्यान्ड एक्स प्यारडक्सको सहयोगमा भारतीय गायक कैलाश खेरका गीत पनि गाए ।कान्तिपुर