काठमाडौ, भाद्र १ - मध्यमाञ्चलकी राष्ट्रिय कीर्तिमानधारी स्नेहाराज्यलक्ष्मी राणाले १७ औं पुरुष तथा १६ औं महिला राष्ट्रिय सुटिङको दोस्रो दिन बुधबार उत्कृष्ट प्रदर्शन गरेकी छन् । उनले महिला १० मिटर एयर राइफलमा सबैभन्दा बढी ३ सय ८८ अंक बटुलिन् । चार सयमा स्नेहाराज्यलक्ष्मीले १२ अंक कम जोडेकी हुन् ।

स्नेहाको राष्ट्रिय कीर्तिमान ३ सय ९९ अंकको छ । सातदोबाटोस्थित सुटिङ रेन्जमा भएको खेलमा नेपाल प्रहरीकी दुर्गा सिञ्जालीले ३ सय ७० र मध्यमाञ्चलकी कुलीन राणाले ३ सय ६८ अंक जोडे । महिलाकै १० मिटर एयर पेस्तोलतर्फ कुल ४ सयमा नेपाल आर्मीकी सरिता बस्नेतले ३ सय ३३ अंक जोडिन् ।

प्रहरीकी सीमा चौधरीले ३ सय २२ र मध्यपश्चिमाञ्चलकी माधवी श्रेष्ठले ३ सय १२ अंक बटुले । पुरुषको १० मिटर एयर पेस्तोलमा नेपाल आर्मीका सुदन खड्काले ६ सयमा ५ सय ४६ अंक जोडे । मध्यपश्चिमाञ्चलका अर्सद खाँले ५ सय २७ र मध्यमाञ्चलका सुरोजविक्रम शाहीले ५ सय २३ अंक जोडे । पुरुषकै १० मिटर एयर राइफलमा ६ सयमा प्रहरीका हरिबहादुर थापाले ५ सय ४१ अंक बटुले । आर्मीका कृष्ण घोरासैनीले ५ सय ३८ र मध्यपश्चिमाञ्चलका संयोगकृष्ण श्रेष्ठले ५ सय ३४ अंक जोडे । - कान्तिपुर