राजधानीमा एक हप्तासम्म चलेको छाला जुत्ता तथा वस्तु प्रदर्शनीमा उपभोक्ताको भीड लाग्यो । स्वदेशी उत्पादनमा उपभोक्ताको आकर्षण बढ्न थालेकाले व्यवसायी पनि गद्गद् भए । अबको चारपाँच वर्षभित्रै विदेशी जुत्तालाई विस्थापित गर्ने लक्ष्य राखेका व्यवसायीहरुले अहिले विदेशमा समेत जुत्ता निर्यात गर्छन् । 

जुत्ता र छालामा काम गर्ने मान्छेलाई हेलाँहोचो र नकारात्मक दृष्टि पूरै निमिट्यान्न नभैसकेको अवस्थामा व्यवसायीहरुको प्रयासलाई सबैले प्रशंसा गरेका छन् । यसै सन्दर्भमा हामीले छाला जुत्ता तथा वस्तु उत्पादक संघका अध्यक्ष होमनाथ उपाध्यायसित कुराकानी गरेका छौं ।

पछिल्लो समयमा नेपाली छाला तथा वस्तुमा उपभोक्ताको आकर्षण बढ्दै गएको छ । प्रयोगकर्तासँगै उत्पादकहरु पनि बढिरहेका छन् । अझै माग अनुसारको वितरण हुन सकेको छैन । मागको ५५ प्रतिशत मात्रै यहाँका उद्योगहरुले उत्पादन गर्न सकेका छन् ।

एक त माग बढ्ने बित्तिकै उद्योगहरुको संरचना विस्तार गर्नुपर्ने हुन्छ । कच्चा पदार्थ पनि त्यही अनुसार चाहियो । कार्यक्षमता पनि बढाउन सक्नुपर्यो । अर्को सबैको साझा समस्या उर्जा समस्या भयो । यस्तै हामीकहाँ अझै दक्ष जनशक्तिको अभाव छ । सामान्य सीप भएका मजदूरले हुँदैन । दक्ष कालिगढकै आवश्यकता पर्छ । कसैले नयाँ उद्योग खोलेमा उसले चलिरहेको उद्योगबाटै कालिगढ लैजानुपर्ने हुन्छ । अर्को कुरा ८० प्रतिशत कच्चा पदार्थ विदेशबाटै आयात गर्नुपर्ने अवस्था छ । बाहिरबाट ल्याउनुपर्ने भएकाले कहिलेकाहीं भनेकै समयमा कच्चा पदार्थ आइपुग्दैन । त्यसैले पनि माग अनुसार उत्पादन गर्न समस्या छ ।

केही त छन् । तर यहाँको कच्चा पदार्थले मात्र पुग्दैन । छाला जुत्ता तथा वस्तु उत्पादन गर्ने कारखाना मात्रै खुलेर हुँदैन । सँगसँगै कच्चा पदार्थ उत्पादन गर्ने कारखाना पनि खुल्नुपर्छ । त्यस्तै सोलको कारखाना, जुत्ता राख्ने बक्सको कारखाना, जुत्ता राख्ने ब्याग तथा सर्पोटको कारखाना पनि त्यसै अनुसार स्थापना हुन जरुरी छ । यो लगायत जुत्तासँग सम्बन्धित झण्डै तीन दर्जन अरु पदार्थ हामी प्रयोग गर्छौ, ती सबैको कारखाना पनि हुने हो भने राम्रो हुन्छ । ती सहायक उद्योग यहाँ स्थापना भएका छैनन् । ती स्थापना हुने हो भने लागत कम लाग्छ र उत्पादन क्षमता स्वतः बढ्छ ।

अवहेलना त होइन, तर नकारात्मक सोच चाहिं अझै परिवर्तन हुन जरुरी छ । हुन त हामी अधिकाँश व्यवसायी क्षेत्री बाहुनहरु नै छौं । तर शुरुशुरुमा कारखानामा काम गर्दा केही कर्मचारीहरुले छाला जुत्तामा काम गर्ने भनेर विवाह हुन गाह्रो भयो भन्थे । मलाई चाहिं यस्तो भएन ।

प्रदर्शनीबाट यसको प्रवर्धनमा निकै सघाऊ पुर्याएको छ । उपभोक्ताले सस्तो दाममा गुणस्तरीय सामान त पाएका छन् नै । व्यवसायीहरु पनि व्यापार बढेकोमा दंग छन् । कति व्यवसायीहरु त महिना महिनामा प्रदर्शनी गर्नुपर्यो भन्छन् । जे होस् प्रदर्शनीले नेपाली छाला जुत्ता तथा वस्तुको उत्थान, प्रबर्धन र विस्तारमा निकै सघाऊ पुर्याएको छ । आगामी वर्षहरुमा समेत यसलाई निरन्तरता दिने योजना छ ।अनलाइन खबर