काठमाण्डौ, माघ १३,

मुम्बई हानिए पश्चात परिचय मार्फत नेपाली सिनेमामा कमब्याक भएका अभिनेता निखिल उप्रेती अभिनित चलचित्र परिचय शुक्रबारदेखि देशभरका सिनेमा घरमा लाग्दैछ ।

भारतीय निर्देशक आकाश पाण्डेद्धारा निर्देशित तथा उतैका निर्माता संजय नरेन्द्र निर्मित सो सिनेमामा भारतकै अभिनेत्री मोनिका बेदीले मुख्य भूमिका निवार्ह गरेकी छिन् । तर निखिल र मोनिकाको उपस्थितिमा भब्य प्रिमियर गर्ने योजना बनाएको परिचय यूनिटले हिरो हिरोईनलाई उपस्थित गराउन नसक्दा प्रिमियरको माहोल निकै साधारण बन्यो ।

काठमाण्डौको हिरारत्न सिनेमा घरमा आयोजित प्रिमियर शोमा मोनिका र निखिल बाहेक सिनेमा क्षेत्रका सिमित चलचित्रकर्मीको मात्र उपस्थिति थियो । अचानक आयोजना गरिएको प्रिमियरको निम्तो वितरक समेत रहेका सुनिल मानन्धरले अन्तिम समयमा थाहा पाउदा उनी पनि प्रिमियरको बिषयमा असन्तुष्ट रहे ।

करिब ९५ प्रतिशत छायांकन पोखरामा नै गरिएको उक्त चलचित्रमा मोनिका बेदी र निखिल उप्रेतीका अलावा सुशील क्षेत्री, नागेन्द्र रिजाल नबीन श्रेष्ठ, रस्मी भट्ट, शिशिर राणा लगायतका कलाकारहरुको अभिनय रहेको छ । पारिवारिक कथाबस्तुमा आधारित रहेर निर्माण गरिएको उक्त चलचित्रमा शिब ढकालको छायांकन, शेखर सन्तोषको सङ्गीत, राजकुमार उप्रेतीको द्वन्द, शिव बिक र गोविन्द राईको नृत्य रहेको छ ।

आजै शुक्रबारबाट अन्य दुई चलचित्र 'बिजयपथ' र 'सलाम छ मायालाई' पनि प्रदर्शनमा आएका छन् । बसन्त निरौलाको निर्देशनमा बनेको चलचित्र 'बिजयपथ' मा निखिल उप्रेती, संचिता लुइँटेल, सुशिल क्षेत्री, पवित्रा आचार्य, मिथिला शर्मा लगायतले अभिनय गरेका छन् । यसैगरी दिपक खाँडले निर्देशन गरेको चलचित्र 'सलाम छ मायालाई' भने राजधानीका मात्र रिलिज हुनेछ । केहि बर्ष अघि मोफसलमा रिलिज भएको सो चलचित्रमा विराज भट्ट, गरिमा पन्त, कृष्ण भट्ट र रञ्जना शर्माले अभिनय गरेका छन् ।फिल्मीखबर

काठमाण्डौ, माघ १२,

जर्मनीको बर्लिनमा आउँदो फेब्रुअरी ९ देखि १९ सम्म हुने बर्लिन फिल्म महोत्सवमा दीपक रौनियारले निर्देशन गरेको नेपाली चलचित्र 'हाईवे' प्रतिश्पर्धामा उत्रने भएको छ । विश्वमा चर्चित महोत्सव मध्येको एक मनिने बर्लिन महोत्सवमा आफ्नो चलचित्र छनोट भएपछि निर्देशक रौनियार निकै खुसी भएका छन् ।

महोत्सवमा छनोट भएका विश्वका बिभिन्न मुलुकका ११ फिचर चलचित्रमा आफ्नो पनि चलचित्र परेपछि निकै खुसी हुँदै रौनियारले आफ्नो फेसबुकमा लेखेका छन्, 'धेरै खुशी हुँदा पनि मन भक्कानिंदो रहेछ । मैले अघिल्लो हप्ता थाह पाएँ जतिवेला मैले पहिलो पटक "हाईवे" को लागि बर्लिनको निम्तो पाएको थिएँ ।' दिपकले चलचित्रलाई सोही महोत्सवमा वर्ल्ड प्रिमियर गर्ने बताईएको छ । बिगत ३२ बर्ष देखि चल्दै आएको सो महोत्सवमा नेपाली चलचित्र छनोट भएको यो पहिलो पटक हो ।

चलचित्र हाईवेमा नेपालीहरूले राजमार्गको यात्रा गर्दा भोग्नु परेका समस्याहरूको कथालाई यथार्थ ढंगले प्रस्तुत गरिएको छ । कर्म, सौगात मल्ल, ऋचा शर्मा, विनय श्रेष्ठ, दयाहाङ राई, राजन खतिवडा लगायतले अभिनय गरेको सो चलचित्रको पोष्टप्रोडक्सन अमेरिकामा गरिएको हो । पोष्टप्रोडक्सनका लागि युनिटले ३३ हजार ६ सय ४७ अमेरिकी डलर संकलन गरेको थियो । चलचित्रलाई समिरमणि दीक्षितले निर्माण गरेका हुन् ।फिल्मीखबर

काठमाण्डौ, माघ ११,

आकाश अधिकारीले निर्देशन गरेको चलचित्र 'काठमाण्डू' मा अभिनय गरेकी बिदेशी नायिका रिया मार्फी अमेरिकी नागरिक हुन् भनि सहि उत्तर पठाउने मध्येबाट गोला प्रथाद्वारा बिशाल लामा बिजयी भएका छन् । लामाले 'काठमाण्डू' को तर्फबाट आकर्षक गिफ्ट ह्याम्परको साथमा रिलिजको पूर्व सन्ध्यामा हुने प्रिमियर समारोहमा सहभागीता जनाउन पाउने भएका छन् ।

यस्तै 'काठमाण्डू' चलचित्रको अन्तिम क्विज अर्न्तगत आजको प्रश्न छ : 'काठमाण्डू' कि नायिका प्राप्ती घिमिरे कुन देशको एनआरएन हुन् ?' विकल्पहरू रहेका छन् : १. क्यानडा २. जर्मनी ३. अमेरिका । आफूलाई सहि लागेको उत्तर तलको कमेन्ट बक्समा गएर पूरा नामका साथ आधिकारिक इमेल राखी पोस्ट गर्नुहोला । सहित उत्तर पठाउने मध्येबाट एक जनालाई गोला प्रथाद्वारा बिजयी घोषणा गरिनेछ र आकार्षक आकार्षक गिफ्ट ह्याम्परका साथ सो चलचित्रको प्रिमियरमा सहभागी गराईने छ ।

क्विजमा रहेकी नायिका घिमिरेले आफू बिदेशमा भएको र चलचित्रको प्रिमियरमा सहभागी हुन नपाएकोमा दु:ख व्यक्त गरेकी छिन् । फिल्मीखबरसँग कुरा गर्दै घिमिरेले भनिन्, 'मेरो पहिलो चलचित्र भएकोले प्रिमियरमा सहभागी हुन नपाउँदा र चलचित्रको पब्लिसिटीमा हिड्न नपाउँदा दु:ख लागेको छ ।' चलचित्रमा आफूले सक्दो मेहनत गरेको बताउँदै एनआरएन नायिका घिमिरे भन्छिन्, 'चलचित्र राम्रो बनेको छ र मैले पनि सक्दो राम्रो गर्ने प्रयास गरेकी छु । आशा छ सम्पूर्ण दर्शकहरूले चलचित्रलाई मन पराउनु हुनेछ ।'

अमेरिका, जर्मनी, बेल्जियम लगायतका देशमा दर्शकको राम्रो प्रतिक्रिया पाएको बताउने 'काठमाण्डू' डेब्यू यि नायिकाले चलचित्रको सफलताको कामना गरेकी छिन् । भन्छिन्, 'म बिदेशमा भए पनि चलचित्रको सफलताको कामना गरिरहेकी छु ।'फिल्मीखबर

नायिका मनिषा कोइराला अहिले मुम्बइमा छिन् । बलिउड र कलिउडकी नायिका मनिषा श्रीमानसँग डिभोर्स गर्ने निधो गर्दै केही समयअघि मुम्बइ हानिएकी थिइन् । 

मुम्बइ पुगेको केहीदिनपछि उनले आफ्ना पूराना साथीभाइलाई जम्मा पारी आफु लोग्नेसँग सम्बन्ध विच्छेद गर्ने अन्तिम तयारीमा पुगेको खुलासा मात्र गरिनन् फेरी बलिउडमा फर्किन चाहेको इच्छा समेत जाहेर गरेकी थिइन् । 

त्यसपछि मनिषाले मुम्बइमा के गरिरहेकी थिइन् भन्ने बारेमा थाहा पाइएको थिएन । तर एक्कासी मनिषाको बारेमा नराम्रो खबर बाहिर आएको छ ।

हालै मुम्बइको बर्सोवामा रहेको एक नयाँ रेस्टुरेन्टमा मनिषा रक्सीको नशामा लठि्ठएको अवस्थामा फेला परेकी छिन् । आफ्ना भुतपूर्व ब्वाइफ्रेन्ड प्रशान्त चौधरीले खोलेको रेष्टुरेन्टको उद्घाटन समारोहमा पुगेकी मनिषाले यतिधेरै रक्सी पिएकी थिइन् की उनले आफैलाई सम्हाल्न सकिरहेकी थिइनन् ।

भारतीय संचार माध्यमका अनुसार मनिषा कालो-खैरो रंगको पहिरनमा रेष्टुरेन्ट पुगेकी थिइन् । भुपु मायालुको निम्तोलाई स्विकारेर उद्घाटन समारोहमा पुगेकी मनिषाले त्यहीँ खुसीमा यति धेरै पिइछन् की उनी एक्लै घर जान सक्ने अवस्थामा समेत थिइनन् । उनलाई अरु हितैषीहरुले घरसम्म पूराइदिएका थिए । मुम्बइ हानिएकी मनिषाको यस्तो हालत भएको खबर सुनेर उनका नेपाली प्रसंसक समेत दुखी बनेका छन् ।अनलाईन खबर

दोहा, माघ १०,

प्रेम दिवसको अवसर पारेर कतारको दोहा सिनेमा हलमा यहि आउँदो फेब्रुअरी १० तारिखको दिन मिस यु को पहिलो प्रिमियर शो हुँदैछ । पृथक शैलीको प्रेम कथा र उच्च प्रविधी संयोजनमा निर्माण गरिएको मिस यु को प्रदर्शनको समय जति नजिकिदै आउँदैछ , त्यति नै यस चलचित्रको ग्लोवल मार्केटमा माग बढ्दै गएको कुरा शैलेन्द्र कठायतले बताए ।

नेपालमा फेब्रुअरी १७ तारिखको दिन रिलिज हुन लागेको सो चलचित्रको विदेशमा प्रदर्शनको लागि डिमाण्ड बढ्दै गएको विदेश विभाग प्रमुख सुमन गैरेले बताएका छन् । कतारको दोहा स्थित दोहा सिनेमा हलमा पहिलो स्क्रनीङ गर्न लागिएको उक्त चलचित्रमा नम्रता श्रेष्ठ, दिलीप रायमाझी र बरुण रानाको शीर्ष भूमिका रहेको छ भने किचमान चित्रकार र बाबु बोगटीको संगीत रहेको छ ।

नेपाल लगयात विदेशमा छायांकन गरिएको सो चलचित्रमा धिरज जंग शाह र राजु बिक्रम थापा छायांकार रहेका छन् भने कथा सुरज सुव्वा नाल्वोको रहेको छ । कतारको समय अनुसार दिनको २ बजेबाट प्रदर्शन गर्न लागिएको चलचित्रको टिकट दर १५ र २० कतारी रियाल मात्र रहेको कठायतले जनाएका छन् ।

शंकर आचार्य

पर्सा, माघ १० गते ।

दुई वर्ष अघिसम्म वीरगन्जको श्रीराम सिनेमा हलमा हिन्दी फिल्मको बोलवाला हुन्थ्यो । अचेल स्थिति फेरिएको छ र भोजपुरी फिल्मको दबदबा बढ्दै गइरहेको छ । वर्षको झन्डै ६० प्रतिशत समय यो हलमा भोजपुरी फिल्म चल्छ । बाँकी समय मात्र हिन्दी फिल्मले स्थान पाउँछन् । 'भोजपुरी फिल्मको माग दर्शकबाटै बढी आउँछ,' हलका लेखापाल विकास कुमारले भने, 'फेरि सजिलै वितरकले उपलब्ध गराउने र हिन्दीभन्दा बढी यसमै फाइदा हुने भएकाले हामी पनि भोजपुरी फिल्मलाई प्राथमिकतामा राख्छौं ।'

वीरगन्ज निवासी भोजपुरी फिल्मका निर्देशक अनील सर्राफ पनि एक दशकयता नेपाल र भारत दुवै मुलुकमा भोजपुरी फिल्म उद्योगले फड्को मारेको दाबी गर्छन् । नेपाल र भारतका विभिन्न प्रान्तबाहेक भोजपुरीभाषी बसोबास गर्ने विश्वका अन्य भेगमा पनि भोजपुरी फिल्मको माग हुन थालेकाले हाल यसको निर्माण क्रम पनि ह्वात्तै बढेको उनले बताए । 'सास ननद भौजाई', 'सास ससुरके प्यार' र 'प्यार करेला हिम्मत चाही' गरी तीन भोजपुरी फिल्म निर्देशन गरिसकेका सर्राफले फागुनदेखि चौथो फिल्म 'सलाखें' बनाउँदै छन् ।

हाल हिन्दी फिल्म उद्योगपछि सबैभन्दा ठूलो फिल्म उद्योगका रूपमा भोजपुरी फिल्मले व्यावसायिक फड्को मारिरहेको समेत उनको दाबी छ । नेपालबाहेक भारतको बिहार, उत्तरप्रदेश र पश्चिम बंगालमा भोजपुरी फिल्मको ठूलो बजार रहेको र भारतका मुम्बई, दिल्ली, पन्जाबसमेतमा नियमित प्रदर्शन हुने उनले बताए । उनका अनुसार स्तरीय भोजपुरी फिल्म बनाइए त्यसले सहजै लगानी उठाउने मात्र नभई व्यावसायिक मुनाफासमेत गर्ने भएकाले हाल भोजपुरी फिल्म निर्माण क्रम बढेको हो । बलिउडमा ठूला कर्पोरेट हाउसहरूले विश्वबजारलाई लक्षित गरेर फिल्म बनाउने र यसका लागि ठूलो बजेट आवश्यक रहेकाले बलिउडका साना फिल्म निर्माताहरू पनि कम बजेटमा निर्माण हुन सक्ने भोजपुरी फिल्मतिरै लोभिरहेका छन् ।

अमिताभ बच्चन, हेमा मालिनी, गोविन्दा, मिथुन चक्रवर्ती, शक्ति कपुर, शहबाज खानसम्मका हस्तीहरूले भोजपुरी फिल्ममा अभिनय गर्न थालेपछि यसतर्फ स्थानीय कलाकारहरू पनि उत्साहित भएको उनको बुझाइ छ । नेपाली फिल्मी क्षेत्रका स्थापित नाम विराज भट्ट, निखिल उप्रेती, कल्याण घिमिरे, रेखा थापा, निरुता सिंह, मिथिला शर्मा, रेजिना उप्रेती, सोनिया केसीजस्ताले पनि भोजपुरी फिल्ममा नियमित रूपमा अभिनय गर्न थालेका छन् । विराजले त अब नेपालीभन्दा भोजपुरी फिल्मलाई नै बढी प्राथमिकतामा राखेका छन् । उनी यो उद्योगमा हाल नम्बर वन हिरोको दाबेदार बनिसकेका छन् । नेपाली कलाकारको सहभागिताले भोजपुरी फिल्म समावेशी बन्ने र यस्ता फिल्म नेपालीमा समेत डब गरेर प्रदर्शन हुने गरेकाले निमार्ताको लगानी सहजै उठ्ने गरेको सर्राफको अनुभव छ ।

एक दशकअघि स्थानीय निर्माता नन्दु श्रीवास्तवले पहिलो नेपाली भोजपुरी फिल्म 'कब होई मिलनवा हमार' निर्माण गरेपछि नेपालमा मात्र नभई भारतमा समेत आधुनिक भोजपुरी फिल्मको जग बसेको सर्राफको दाबी छ । नेपाली निर्देशक किशोर रानामगर निर्देशित यो फिल्मले नेपाल र भारत दुवैमा भव्य व्यापार गर्न सफल भएको थियो । रवि किसन र निरुता सिंह अभिनित यो फिल्मपछि दुवै मुलुकमा भोजपुरी फिल्म निर्माण गर्ने बाढी चलेको उल्लेख गर्दै सर्राफले भने, 'अहिले वर्षमा कम्तीमा पाँच सय भोजपुरी फिल्म बन्न थालेका छन् ।' यसबाट उत्साहित सर्राफ वीरगन्जमै सानै भए पनि भोजपुरी फिल्मका लागि स्टुडियो बनाउनेबारे समेत सोचिरहेका छन् ।

स्थानीय कलाकार शिवजी विश्वकर्मा पनि भोजपुरीकै कारण हाल नेपाली फिल्ममा पनि व्यस्त हुन थालेका छन् । लामा जुँगाका धनी उनी भिलेनको भूमिकामा जमिसकेका छन् ।

'भोजपुरी फिल्मले मलाई अकल्पनीय सफलता र व्यस्तता दिलाएको छ,' नेपाली फिल्म 'लंका' को अभिनयमा व्यस्त विश्वकर्माले भने, 'समयमै नेपाली भोजपुरी फिल्म उद्योगलाई संरक्षण गरे यसले भविष्यमा थुप्रै रोजगारीको अवसर सिर्जना गर्छ ।'साभार :ईकान्तिपुर

काठमाण्डौ, माघ ९,

माघ २० गते देखि रिलिज हुन लागेको चलचित्र 'काठमाण्डू' को सफलताको लागि निर्देशक आकाश अधिकारी जसरी दौडधुपमा ब्यस्त छन् त्यो भन्दा कठोर भएर उक्त फिल्मको सफलताको लागि सो चलचित्रकी हिरोईन ममता प्रधानले भगवानको साहयता लिने भएकी छिन् ।

सोमबार जन्मदिनको अबसरमा आफू अभिनित तेस्रो चलचित्रको सफलताको लागि हिरोईन प्रधानले काठमाण्डूको सफलतासंगै आफ्नो करिअर जोडिएको भन्दै निराहार ब्रत बस्ने सुर कसेकी हुन् । जन्मदिनको प्रसंगमा फिल्मीखबरसंग कुरा गर्दै ममताले भनिन्, 'आज म जन्मिएको दिन भएकाले भगवान पशुपतिनाथको मन्दिरमा पुजाआजा सहित निराहार ब्रत बस्ने योजना बनाएकी छु । त्यसैले आजको दिन मेरा लागि बिशेष हुने छ ।'

हाल सम्म १६ वटा चलचित्र खेलिसकेकी राज्य डेब्यू गर्ल ममता नवअभिनेत्री प्राप्ती घिमिरेसंगको सिमिलर रोलमा काठमाण्डूमा खेलेकी छिन् । काठमाण्डूको स्टोरी ममता र प्राप्तीको वरीपरी घुमेको बताईएको छ । हाल दुई प्रोजेक्टको तयारीमा ब्यस्त ममता नरेश पौडेलले फागुनको पहिलो सातादेखि निर्माण गर्न लागेको चलचित्र स्वीट ड्रिम्समा पनि अनुबन्धीत भैसकेकी छिन् ।

सेक्सी भनेर समेत चिनिने ममताले जन्मदिनमा काठमाण्डूको सफलतासंग आफ्नो सफल करिअर माग्ने योजना बनाएकाले पशुपतिनाथमा रहेका असाहयहरूसंग पनि अलिकती खुशी साट्ने योजना पनि बनाएकी छिन् । तर दिनभर निराहर बसेपनि बेलुकी घरमै जमघटगरी बर्थडे केक पनि काट्ने उनको योजना पनि छ रे... । काठमाण्डूको रिलिज पूर्व सन्ध्यामा पशुपतिनाथको शरणमा पुगेकी यि अभिनेत्रीलाई ह्याप्पी बर्थडे अनि पशुपतिनाथले तिम्रो कामना पुरा गरून् । - फिल्मीखबर

काठमाण्डौ, माघ ८,

आउँदो शुक्रबारबाट देशभरका अधिकांश सिनेमा घरमा रिलिज हुन लागेको चलचित्र 'परिचय' को पब्लिसिटीका लागि सोही चलचित्रका मुख्य पात्र निखिल उप्रेती र मोनिका बेदी नेपाल आउने या नआउने भन्ने बारेमा अन्यौलता देखिएको छ । फिल्मीखबरलाई प्राप्त जानकारी अनुसार उनीहरू रिलिजको पूर्व सन्ध्यामा नेपाल आउने भएका छन् तर अझै यकिनका साथ भने भन्न सक्ने अवस्था छैन ।

चलचित्र सुटिङका लागि केहि महिना अघि नेपाल आएका निखिल अहिले मुम्बईमा नै छन् भने नायिका मोनिका बेदी भारतिय मूलकै हुन् । यसैगरी चलचित्रका निर्देशक आकाश पाण्डे पनि अहिले मुम्बईमा नै छ । उनी पनि केहि दिनमा नेपाल आउने बताईएको छ । अहिले बितरक सुनिल मानन्धरले चलचित्रको प्रचार प्रसारको सम्पूर्ण जिम्मा सम्हालेका छन् ।

करिब ९५ प्रतिशत छायांकन पोखरामा नै गरिएको उक्त चलचित्रमा मोनिका बेदी र निखिल उप्रेतीका अलावा सुशील क्षेत्री, नागेन्द्र रिजाल नबीन श्रेष्ठ, रस्मी भट्ट, शिशिर राणा लगायतका कलाकारहरुको अभिनय रहेको छ । थुप्रै हिन्दी सिनेमाहरुमा मुख्य सहायक निर्देशक बनेर काम गरिसकेका निर्देशक आकाश पाण्डेको यो पहिलो नेपाली चलचित्रको निर्देशन हो ।

पारिवारिक कथाबस्तुमा आधारित रहेर निर्माण गरिएको उक्त चलचित्रमा शिब ढकालको छायांकन, शेखर सन्तोषको सङ्गीत, राजकुमार उप्रेतीको द्वन्द, शिव बिक र गोविन्द राईको नृत्य रहेको छ । संजय नरेन्द्र र सुरेश सुमन यस चलचित्रका निर्माता हुन् । साभार:फिल्मीखबर

काठमाण्डौ, चलचित्रको कथा, प्रस्तुती, गीतसंगीत अनि कलाकारको अभिनय जति महत्वपूर्ण हुन्छ त्यतिनै महत्व लोकेशनको हुन्छ । चलचित्रको लोकेशन र प्रयोग गरिने प्रोपटिजले राम्रो चलचित्रको सुन्दरतामा निखार ल्याएको हुन्छ ।

यहि माघ २० गतेबाट प्रदर्शनमा आउन लागेको बहुप्रतिक्षित चलचित्र 'काठमाण्डू' मा त्यस्ता प्रोपटिजलाई स्थान दिईएको छ जुन अन्य नेपाली चलचित्रमा अहिलेसम्म देखिएको छैन । चलचित्रमा बिश्वमा नै महंगो गाडीका रूपमा चिनिने फेरारी, लिमोजिन, ह्यामर प्रयोग गरिएको छ । यि महंगा गाडीलाई महंगो रकम तिरेर भाडामा ल्याई सुटिङ गरेको चलचित्रका निर्देशक आकाश अधिकारी बताउँछन् । किन गाडीकै लागि ठूलो रकम छुट्ट्याएको त ? आकाश थप्छन्, 'हामी सुन्दर र स्मार्ट देखिन जसरी राम्रा र महंगा कपडा लगाउँछौ त्यसैगरी चलचित्र भित्रको सुन्दरताका लागि हामीले गाडीमा कम्प्रमाईज गरेनौं । त्यसैमाथी अमेरिका पुगिसके पछि मरसिडिज र टोयोटाको पछि के लाग्नु ?'

यतिमात्र हैन नेपालमा छायाँकन गरिएको पार्टमा पनि कुनै कम्प्रमाईज नगरिएको आकाश बताउँछन् । उनी भन्छन्, 'चलचित्रको कथा जति मजबुत छ त्यति नै यस भित्र प्रयोग गरिएका प्रोपटिज र लोकेशन सुन्दर र आकर्षक छन् ।' चलचित्रको प्रोपटिजमा मात्र हैन गीतसंगीतमा पनि आकाशले राम्रै रकम खर्चेका छन् । भारतिय चर्चित गायकगायिका सुखबिन्दर सिंह, कैलाश खेर, सुनिधी चौहान, आरती कक्कड, सञ्जिवनी जस्तालाई काठमाण्डूमा समावेश गरिनु चानेचुने कुरा नभएको आकाशको धारणा छ । यि गायकगायिकाको स्वरले पनि चलचित्रको गुणस्तरमा थप टेवा दिएको उनको भनाई छ ।

यता आकाशले पब्लिसिटीमा पनि कुनै कम्प्रमाईज गरेका छैनन् । काठमाण्डू शहरका मुख्य चोक चोकमा ठूला ठूला होर्डिङ बोर्ड अनि मलहरूमा राखिएको डिजिटल स्क्रिनमा राखिएका काठमाण्डूका गीत प्रोमोले पनि बजेटलाई हाई बनाउन सहयोग गरेको छ । पहिलो पटक रेड क्यामेराले चलचित्र खिचेर क्वालिटीमा अर्को ईटा थपेका आकाश बजेट एक करोड भन्दा बढि भए पनि लगानी उठ्नेमा ढुक्क छन् । भन्छन्, 'चलचित्र राम्रो बनाएको छु । अहिलेका दर्शकले चाहेको चलचित्र मैले पस्किने प्रयास गरेको छु । त्यसैले लगानी उठाई फाईदामा जानेमा ढुक्क छु ।'

काठमाण्डौको परिवर्तित दृश्यहरुको सङ्ग्लो ऐनाको रूपमा परिभाषित गरिएको चलचित्र 'काठमाण्डू' मा आकाश अधिकारी, हलिउड कलाकार रिया मार्फी, रेश मरहठ्ठा, प्राप्ति घिमिरे, ममता प्रधान, संयुक्ता राणा, गौरी मल्ल लगायतले अभिनय गरेका छन् । चलचित्रमा राहुल प्रधानको संगीत रहेको छ ।फिल्मीखबर

अनुप भट्टराई, काठमाण्डौ, माघ ६,

 एकै समय चार हिरोईन रेखा थापा, अरूणिमा लम्साल, ऋचा घिमिरे, मेलिना मानन्धर र झरना थापा आमा बने के होला भन्ने प्रश्न गरियो भने उद्योगमा हिरोईनको खडेरी लाग्ने छ । जुन यथार्थमा परिणत पनि हुदैछ । अहिले तीन हिरोईन् मेलिना, अरूणिमा र संचिता आमा बनेर घरमा थन्किएका छन् भने ऋचा पनि आमा बन्ने तयारीले करिब एक बर्ष उनको फिल्मी सक्रियता घट्ने पक्का छ । बाँकि रहे झरना र रेखा ।

रेखा र झरनाको एक दशक फिल्मी यात्रा सफल भईसकेकाले अहिले सिनेमा उद्योगमा नव नायिकाहरूको खोजी भैरहेको छ । यो खोजीमा केकी अधिकारी, निशा अधिकारी, ऋचा शर्मा, नम्रता श्रेष्ठलाई दर्शकले रूचाए पनि फ्रेस अनुहारको खोजी अझै भैरहेको छ । नवनायिका भित्रने क्रममा आएका नीता ढुङ्गाना, सुमिना घिमिरे, रागिनी खड्गीले पनि पिकअप लिईरहेका छन् । तर आउन नपाई सन्यास घोषणा गरेकी अनुष्का ढकालले घरजम गरिसकेकाले नायिकाको लिष्टबाट उनी आउट भैसकेकी छिन् भने अन्य केहि नायिकाहरू सुस्ताउन थालेका छन् । त्यस्तै कोही बिदेश पलायन हुँदै र हुने शुरमा छन् । त्यसैले नयाँ नायिकाहरूको खोजी हुनु स्वाभाविक पनि देखिएको छ । प्रसङ्ग सुरू गरौ स्क्रिप्ट राईटर हुदै निर्देशकको परिचय बनाएका विकास आचार्यबाट ।

बिकासले जीवन लुईटेललाई जसरी कलिउड प्रवेश गराए त्यसैगरी गत बर्षको हिट सिनेमा 'नाई नभन्नु ल' बाट उनले ऋचा सिहं ठकुरीलाई भित्राए तर ऋचासंगको उनको यात्रा 'म तिम्रो भैसके' सम्म मात्र भयो । अहिले उनी फ्रेस नयिकाको खोजीमा छन् । हालै चलचित्र बिकास बोर्डका सदस्य पदमा नियूक्त बिकास नयाँ बर्ष २०७९ पहिलो साताबाट नयाँ फिल्म बनाउने तयारी गरेका छन् तर कथा अनुसारको हिरोईन नपाउदा उनी छटपटिरहेका छन् । बिकासलाई मात्र हैन लामो समय देखि कलिउडमा सक्रिय निर्देशक नरेश पौडेललाई पनि यो बर्ष हिरोइनको खाँचो पर्‍यो । फागुनको पहिलो साता देखि उनले बनाउने भनिएको फिल्म स्वीट ड्रिम्सका लागि उनले तीन हिरोईनहरू रजतपटमा डेब्यू गराउदैछन् तर विडम्बना नरेशले पनि भने जस्तो हिरोईन पाउन नसक्दा अहिले उनी हिरोईन खोज्दै पोखरा पुगेका छन् ।

अरूणिमा लम्सालसंग उनको यात्राको च्याप्टर क्लोज भएपछी नरेश अहिले आफूले डेब्यू गराएका दुई हिरोईन रेखा थापा र अरूणिमा भित्राए जसरी नयाँ अनुहार भित्राउने तयारीमा छन् । यस्तै छोटो समयमा निरन्तर फिल्म बनाईरहने निर्माताको लिष्टमा थपिएका अभिनेता रोज राणाले पनि ग्याङस्टार चलचित्र बनाउने तयारी पूरा गरिसकेका छन् तर फिल्मका लागि सुहाउदो हिरोईन नपाउदा उनको प्रोजेक्ट पनि अलपत्र परेको छ । फ्रेस हिरोईन नपाएपछी रोजले त गायिकाद्धय अञ्जु पन्त र आस्था विलाई समेत हिरोईनमा एप्रेच गरेका थिए । फ्रेस हिरोइन नपाएपछी आखिर किन गायिकामा आँखा लागाउनुभयो भन्ने प्रश्नमा रोज भन्छन्, 'नयाँ हिरोईन नै खोजेको त हैन तर मेरो फिल्मको कथा अनुसार हिरोईन गायिका हुने भएकाले चलेका गायिकालाई मैले हिरोईनमा लिने सोच बनाएको हो ।' हेरौ को हुने छ ग्याङस्टारको हिरोईन । 

रोज मात्र हैन मुम्बईमा बसेर केही टेलिफल्मको साहायक निर्देशनको अनुभव सगाल्दै गत बर्षदेखि कलिउड नगरीमा प्रवेश गरेका निर्देशक गणेश देव पाण्डेले पनि भने जस्तो हिरोईन नपाउदा उनको दोस्रो प्रोजेक्टको सुटिङ ढिला हुने लक्षण देखिएको छ । मालतीको भट्टी रिलिज हुने समयमा नयाँ चलचित्र मञ्जरीको प्रि–प्रोडक्सनमा ब्यस्त गणेशले मञ्जरीका लागि दर्जनौ मोडहलरूको अडिसन लिईसके तर पनि भने जस्तो हिरोईन पाउन नसकेपछी उनी अब राजधानीका विभिन्न कलेजमा गएर भने जस्तो फ्रेस हिरोईन खोज्ने सुरमा छन् । फिल्मीखबरसंग कुरा गर्दै गणेशले भने, 'कथालाई म्याच हुने क्यारेक्टर नपाउदा हैरान भैसक्यो । त्यसैले अबको केही दिनमै हामी हिरोईन खोज्न कलेज अडिसनमा जानेछौ ।' संसारकै नियम हो हिरोहरूको तुलनामा हिरोईनहरू मुस्किलले डेढ दशक भन्दा लामो समय लिडरोलमा टिकेको पाईदैन । त्यसैले पछिल्लो समय नयाँ नायिका लिएर थ्री लभर्स सिनेमा बनाएका निर्देशक सुरेश दर्पण पोखरेल नयाँ हिरोईनको खोजी आवश्यक रहेको र हुनुपर्छ भन्ने मान्यता राख्छन् । उनले थ्री लभर्समा प्रियंका कार्की र पुजा शर्मालाई हिरोईन बनाए । तर प्रियंकालाई भने प्रशन्न पौडेलेले आफ्नो चलचित्रमा लिईसकेका छन् नयाँ अनुहारको रूपमा । यस्तै शबिर श्रेष्ठले पनि 'के म तिम्रो साथी बन्न सक्छु' बाट १६ बर्षे दिप्ती गिरीलाई नायिकाको रूपमा डेब्यू गराए । 

 सिनेमा उद्योगमा आफन्त र सिफारिसको भरमा कलाकार हुने प्रचलन एकातर्फ समस्याको रूपमा देखापरेको छ भने अर्को तर्फ हिरोईनसंगको निकटताले पनि उनीहरू एउटै निर्देशकका प्राय फिल्ममा रिपिट हुने गर्दछन् । कुनै समय निर्देशक सोभित बस्नेतको प्रोजेक्टमा देखिरहने रेजिना उप्रेती पनि यसपटक सोभितका दुई फिल्ममा देखा परिनन् । सायद सोभितलाई पनि फ्रेस हिरोईनकै महसुस भएर होला यिनले पनि केही नयाँ अनुहारलाई आफ्ना पछिल्ला प्रोजेक्टमा खेलाएका छन् । सोभितले यो बर्ष तिन वटा सिनेमा बनाए जस मध्ये बरदान रेजिनाको प्रोडक्सनमा भएकाले उक्त प्रोजेक्टमा रेजिना लिड रोलमा छिन् तर प्लान र दुलही रानीमा सोभितले राजेन्द्र खड्गीको छोरी रागिनीलाई लिड रोल दिए । 

 नव नायिका खोज्ने यि त प्रतिनिधि पात्र मात्र हुन् । सिनेमाको मुख्य सौन्दर्यतामा नयाँ हिरोईनको ज्वली लुक्सले समग्र सिनेमालाई एउटा नयाँ वेट दिने गर्छ । मिठा सपना बोकेर आउने नवनायिकाको बिषयमा कास्टीङ काउचका कुराहरू पनि उठ्ने हुदा सिनेमा उद्योग प्रति समाजको धारणा कहिले काही नकारात्मक बनेको पाईन्छ । नवनायिकाहरू आउने क्रमलाई स्वागत गर्नु पर्छ तर परिवर्तित यो उद्योगमा अभिनयलाई बुझेका र कलालाई सम्मान गर्ने कलाकारको खाँचो अझै देखिएको छ । स्वागत छ नयाँ नायिकाहरूलाई ! साभारः फिल्मिखबर

काठमाण्डौ, एउटै समयमा आफू अभिनित दुई सिनेमा रिलिज हुदै गर्दा अभिनेत्री केकी अधिकारीलाई प्रोमोशनको पिडाले निकै सताए जस्तो देखिन्छ । फागुन पाँच गते गोपीकृष्ण मुभिजले निर्माण गरेको चलचित्र मायाको बारीमा र त्यसको अघिल्लो साता मेघा बजेटको आई एम सरीको रिलिज डेट तोकिएपछी केकीलाई प्रोमोशनको पिडाले सताएको हो ।

केकीका फेसबुक भित्ताहरूलाई चिहाउने हो भने प्रोमोशनको पिडाले उनी नराम्ररी छटपटिरहेको भान हुन्छ । यस्तै आफू अभिनित दुवै सिनेमाको प्रोमोशनबाट अबजस नपाउने रणनीति अनुरूप उनले दुवै सिनेमाको गित देखि अन्य सामग्रीको प्रोमोशन आफ्नो फेसबुक वालमा गरिरहेकी त छिन् तर अरू कसैको माध्यमबाट । प्रोमोशनका लागि तयार गरिएका केकीका दुई सिनेमाको गीतका युट्यूव लिंकलाई उनका साथीहरूले उनको फेसबुक भित्तामा पोष्ट गरिदिएका छन् ।

यो समाचार तयार पारून्जेलसम्म मायाको बारीमाका नायक एसराज गरचले आफ्नो फिल्मको प्रोमोलाई केकीको वालमा पोष्ट गरिदिएका छन् । जसबाट प्रष्ट हुन्छ कि प्रोमोशनको बिषयमा केकीले साथीहरूको साथ लिईरहेकी छिन् । सायद प्रोमोशनमा कुनै एक फिल्म तल पर्ने संकेतललाई बुझ्दै केकीले आफू विवादमा नतानिउ भनेर यो रणनीति अपनाएको देखिन्छ तर फिल्मीखबरले उनको रणनीतिलाई सजिलै पत्ता लगाएको छ ।

हालैको एक भेटमा केकीलाई एउटै समय तपाईका दुई सिनेमा आउदैछन् कसरी प्रोमोशन गर्नुहुन्छ भन्ने प्रश्नमा उनले प्रतिक्रिया दिएकी थिईनन् तर फेसबुकमा उनका मौन आवाजहरूले उनी प्रोमोशनको बिषयमा तटस्थ बस्न चाहन्छिन् । यध्यपी केकीको फेसबुक वालमा अरू कसैले उनका दुवै सिनेमाको गीत र प्रोमो लिंक राखिदिए पनि आई एम सरीको विभिन्न स्टील फोटोहरूलाई उनले आफै सार्बजनिक गरिरहेकी छिन् ।

आई एम सरी हरि महतको निर्माणमा दिनेश राउतले डेब्यू फिल्मको रूपमा निर्देशन गरेको चलचित्र हो । जुन माघ २७ गते देखि देशब्यापी रिलिज हुदैछ । चलचित्रमा आर्यनसंग केकीको अनस्क्रिन रोमान्स छ । केकी र आर्यनले एउटा म्यूजिक भिडियो संगै गरेका छन् भने आई एम सरी उनीहरूले काम गरेको पहिलो चलचित्र हो । फिल्मीखबर

काठमाण्डौ, गत पौषको पहिलो साता फिल्मीखबरले गायिका मल्लिका कार्की र हिरो दिवस उप्रेतीको दोष्तीको बारेमा समाचार प्रकाशित गरेको थियो । जस अनुरूप उक्त दोष्तीको निकटता ज्यादै रहेको आज आएर प्रमाणित भएको छ ।

नायक रमेश उप्रेतीका भाई दिबसले मल्लिकालाई आज साँझ अमेरिका उडाएका छन् । महिना दिनका लागि भनेर अमेरिका उडेका उनीहरू कहिले फर्किन्छन् त्यो त टुङ्गो छैन तर अमेरिका उड्नु अघि फिल्मीखबरसंगको कुराकानीमा दिवस दङ्ग थिए । अमेरिकाका विभिन्न स्टेटमा आयोजना हुने सागीतिक कार्यक्रममा मल्लिकाले गीत गाउने छिन् भने त्यो गीतको तालमा दिवस नाच्ने बताईएको छ ।

यस्तै दिवसकै टिममा संगीतकार शम्भुजित बाँस्कोटा र गायक विमल डागी पनि मंगलबार अमेरिका उडेका छन् । उक्त टोलीको नेतृत्व शम्भुजित बाँस्कोटाले गरेका हुन् । बाँस्कोटाले आफ्ना दर्जनौ सुपर हिट गीतहरूलाई अमेरिकी बासी नेपालीमाझ गाउने छन् ।

यस्तै बाँस्कोटाले नेपाली चलचित्रको अमेरिकी बजारको सम्भाब्य अध्ययन गर्ने योजना रहेको अमेरिका उड्नु अघि जानकारी गराए । पछिल्लो समय अमेरिकाले चर्चित गायक गायिकालाई समेत भिसा नदिईरहेको अवस्थामा शम्भुजितको हाईटलाई आधार मान्दै अमेरिकाले मल्लिका र दिवसलाई पनि भिसा दिएको हो । फिल्मीखबर

मुम्वई। बिगवोसमा रहँदा पोर्न स्टार सनी लियोनले पाएको व्यापक चर्चाकै कारण बलिउडकी अभिनेत्री करिना कपुरले तिनको एडल्ट फिल्मबारे जान्न गुगल गरेकी छन्। आफु र दिपीका पादुकोण जस्ता अभिनेत्रीलाई पनि पछाडी पार्दै सनी लियोन गुगलमा सर्वाधिक खोजिने सेलिव्रटी वनेपछि उनले सनी लियोनको वास्तविकता जान्न गुगल गरेको करिनाको साथीको हवाला दिएर एक भारतीय पत्रिकाले जनाएको छ।

सनि लियोन दैनिक रुपमा सञ्चारमाध्यममा छाउन थालेपछि उत्सुक भएकी करिनाले उनको बारेमा जान्न गुगलमा लियोनलाई खोजेको हुन करिना निकट स्रोतले जनाएको छ। चलचित्र निर्देशक तथा निर्माता महेश भट्ट समेत लियोनलाई भेट्न बिगवोसको घरमै पुगेका थिए। उनले लियोनलाई उनको विवादास्पद फिल्म जिस्म २ मा अभिनय गर्न प्रस्ताव समेत गरेका थिए।

लियोनबारे जान्न करिनाले आफ्ना खास साथीहरुलाई घरमा वोलायर उनको नीजि वेभसाइट हेरेकी थिइन। हेर्ने क्रममा उनीहरुले लियोनको वास्तविकता थाहा पाएका थिए। लियोन साच्चिकै एडल्ट फि्लममा काम गर्ने गरेको तथ्य पनि उनीहरुले थाहा पाएका थिए। केहि समय हेरेपछि लियोनको नीजि वेभसाइटबाट लगआउट गर्दै उनीहरु फर्किएका थिए।

प्रदर्शनीअघि नै मुलुकभर च्यारिटी सो मार्फत चर्चा कमाएको फिल्म 'दसगजा' अब थाइल्यान्ड र हङकङ हुँदै कतार पुग्ने भएको छ । दोहास्थित खोटाङ सर्भिस सोसाइटीले फिल्मको च्यारिटी सो गर्न लागेको हो । आगामी फेब्रुअरी २४ कतारको दोहा सिनेमा हलमा दुई सो हुन लागेको फिल्मका निर्माता तथा कलाकार नवल खड्काले बताए ।

काठमाण्डौ, हुन त रेखा थापाले गीत नगाएकी हैनन् तर उनले गाएका चार वटा गीत त्यति चर्चामा छैनन् । चर्चा नपाएको आफ्नो स्वरलाई तिखार्दै रेखाले अब जादुमयी आफ्नो आवाजलाई दर्शकको मुखमा झुण्डाउने प्रयास गर्दैछिन् । चुलबुले रेखाले दर्शकको मुखमा झुण्डिने गीत गाउने कार्यलाई अगाडी बढाउन कम्मर कसिसकेकी छिन् ।

रेखा फिल्मसको पहिलो प्रोजेक्ट अजम्बरी नातामा बाल आवाजमा गीत गाएकी रेखाले त्यसपश्चात चलचित्र ट्याक्सी र्डाईभरमा पनि गीत गाईन् तर गीत भन्दा अभिनयमा उनी जमेपछी गीत गाउने रहर त्यतिकै रह्यो उनको । तर समयले कोल्टे फेर्दै छ र रेखाले आफ्ना पूराना इच्छाहरूलाई पूरा गर्दैछिन् ।

सायद रेखाको पावर बुझेर होला कोरियोग्राफर शंकर विसीले उनको आवाजमा गीती एल्बम निकाल्ने तयारी गरिरहेका छन् । गत दशैको छेकोमा समेत रेखासंग एउटा गीत गाईसकेका शंकरले दुई दिन देखि रेखाको आवाजमा गीत रेकर्ड गरिरहेका छन् । दुई साता पछी 'समिक्षा' नामक एल्बम निकाल्ने तयारी गरेका शंकरले रेखाको दुई वटा एकल र संयूक्त साथै आफ्नो एकल स्वर सहित ६ वटा गीत रेकर्ड गर्दैछन् । 'पहिलो पटक आफ्नै संगीतमा एल्बम निकाल्दै छु', कमलादी स्थित मालश्री स्टूडियोमा गीत रेकर्ड गर्नमा ब्यस्त रहेका शंकरले भने ।

यस्तै रेखाले गीत गाउने रहर पुरानो रहर भएता पनि ठाँउ नपाईरहेको अवस्थामा शंकरले आग्रह गर्दा आफ्ना पूराना रहरहरूलाई ब्यूत्ताएको बताईन् । 'खै कस्तो पर्ने हो मेरो दुलाहा राजा...', 'उसले औठी लागाई दिदा कस्तो होला मलाई ...' भन्दै गीत रेकर्ड गरिरहेकी रेखालाई फिल्मीखबरले तपाई पर्फेक्ट गायिका हो त भन्ने प्रश्न गर्दा उनले भनिन्, 'हैन, तर म राम्रो गाउने प्रयास गर्दैछु ।'

गायक प्रेमराजा महतसंग पनि दोहोरी गीत गाएकी रेखाले उक्त गीत सार्बजनिक नहुदा आफ्नो गायन कला बाहिर आउन नपाईरहेको अवस्थामा यसपाली भने आफ्नो स्वरले बजार तताउने विश्वास लिएकी छिन् । 'रावणको सुटिङ भैरहदा शंकर दाईले मेरो लागि सुहाउने गीत छ भन्नु भयो अनि म रेडी भए । सायद राम्रो पनि गाएकी छु होला', आफ्नो स्वरलाई आफै जज गर्दै रेखाले भनिन् । भबिष्यमा आफ्नै एल्बम निकाल्ने सोच पनि त होला नि भन्ने प्रश्नमा रेखाले भनिन्, 'अहिले सम्म त त्यस्तो सोचाई छैन तर भबिष्यमा मुड चल्यो भने पक्कै निकाल्छु ।'

यस अघि थुप्रै गायक गायिकाको स्वरलाई रेकर्ड गरिसकेका रेकडिष्ट कुमार रानाले अरू गायक गायिका भन्दा रेखाको स्वर कम नभएको प्रतिक्रिया दिए । उनले भने, 'प्रोफेशनल गायक गायिका हुनुभएको भए हरेक कुरामा नोट गर्दा गीत बिग्रन पनि सक्थ्यो तर रेखा जीले गाउने कुरामा मात्र ध्यान दिदा गीत राम्रो भएको छ ।' फिल्मीखबर

काठमाण्डौ,सिनेमामा मात्र ब्यस्त रहने कलाकारहरू पछिल्लो समय समाजसेवामा पनि सक्रिय हुन थालेका छन् । कोही ब्यक्तिगत रूपमा सक्रिय छन् त कोही विभिन्न संघसंस्थाको आग्रहमा आफूलाई समाजसेवी बनाईरहेका छन् । यसै सन्दर्भमा एक पटक लागूपदार्थ दुर्व्यसनी विरूद्धको सदभावना दुत भईसकेकी अभिनेत्री रेखा थापाले आईतबार देखि दैवी प्रकोप नियन्त्रण अभियानका लागि सदभावना दुतको जिम्मेवारी पाएकी छिन् ।

प्रकोप पूर्व तयारी सञ्जाल (डिपीनेट नेपाल) ले पत्रकार सम्मेलन गदै थापालाई आउदो तीन महिनाका लागि सदभावना दुत घोषणा गरेको हो । यो तीन महिनामा रेखाले उक्त संस्थाले आयोजना गर्ने विभिन्न सभा सम्मेलन तथा ५० वटा जिल्लामा पुगी दैबी प्रोकपका बारेमा सचेतना फैलाउने बताईएको छ । सदभावना दुतका लागि तयार गरिएको एग्रीमेन्टमा डिपिनेटका अध्यक्ष मिन बहादुर क्षेत्री र रेखाले हस्ताक्षर गरेका थिए ।

रेखाले कलाकारको नाम भएपनि पावर नभएको गुनासो गर्दै प्रकोप नियन्त्रण अभियानलाई आफ्नो बल बुताले भ्याएसम्म सफल पार्ने प्रतिबद्धता ब्यक्त गरिन् । यस्तै उनले समाजसेवामा आफ्नो रूचि पहिले देखिनै रहेको बताउदै सदभावना दुतले एउटा इच्छा पुरा गरिदिएको भन्दै विना पारिश्रमीक उक्त कार्यका लागि हस्ताक्षर गरेको बताईन् ।

विपद ब्यावस्थापन ऐन कार्यान्वयन लागि तयार गरिएको मौस्यौदा अलपत्र परिरहेका बेला रेखा मार्फत राजनीतिक दलका नेतालाई समेत उक्त ऐन कार्यान्वयन गर्न आग्रह गरिने डिपीनेटको योजना छ ।

चैत २७ देखि रिलिज हुन लागेको रेखा फिल्मसको छैठो प्रोजेक्ट रावणको प्रोमोशनमा समेत खटिरहेकी रेखाले आफू निर्माता भएको प्रसंग निकाल्दै एउटा सिनेमा बनाउदा ४० जनाको रोजीरोटी प्रत्यक्ष पुरा गर्न सफल भैरहेको भन्दै आगामी दिनमा सिनेमा निर्माणको कार्यबाट समाजसेवाका कार्यलाई अझ अगाडी बढाउने बताईन् ।

पछिल्लो समय महानायक राजेश हमाल, करिश्मा मानन्धर तथा मह जोडी विभिन्न अभियानका सदभावना राजदुत भैरहेको अवस्थामा रेखालाई डिपोनेटले आफ्नो अभियान सफल पार्नका लागि रणनीतिक योजना अनुरूप सदभावना दुत बनाएको हो । फिल्मीखबर

एजेन्सी। बलिउड अभिनेता अनिल कपुरले इन्टरनेशनल शो २४ को इन्डियन रिमेकको लागि एक भारतीय टीभी च्यानलसँग करार गरेका छन्। अनिल कपुर र सो टीभी च्यानल बीच ८५ करोड रूपैयाँमा करार भएको बताइएको छ। भारतीय टीभी इतिहासमा यो करार सबैभन्दा ठूलो भएको बताइएको छ।

करारमा उल्लेख भएको रकम कार्यक्रमको उत्पादन, कास्टिंग, अनिल कपुरको पारिश्रमिक र पोस्ट प्रोडक्सन समेतको भएको बताइएको छ। अनिल कपुरले शो २४ को भारतीय संस्करणलाई यसको अन्तराष्ट्रिय भर्सन जस्तै बृहत स्तरमा बनाउन चाहेको बताइएको छ।

 शो २४को अन्तराष्ट्रिय रुपमा उत्पादन गरेको उत्पादकले भारतमा कुनै तेस्रो पक्षले कार्यक्रमको उत्पादन तथा प्रसारणको अधिकार लिन नसकोस भन्ने चाहेको थियो।

केहि महिनामा टीभीमा देखिने अनिलको शोमा भारतीय तथा दक्षिण एशियाली उपमहाद्धिपका दर्शकले यसअघि नदेखेका कुरा देख्न पाउने दावी गरिएको छ।